Ońtústik Qazaqstan, Jambyl oblysynyń sharýalaryn shegirtke shyǵynǵa batyrýda, - dep habarlaıdy Qamshy.kz 31-arnaǵa silteme jasap habarlaıdy.

Jambyl men Ońtústik Qazaqstan oblystarynyń sharýalary shegirtkeden shash etekten shyǵynǵa batýda. Jaıylymdy jaıpaǵan zıankes endi egistikke aýyz salýda dep fermerler dabyl qaǵyp otyr. Maýsym shyqpaı mal azyǵynan aıyrylǵan jurt, bul der kezinde dári sebilmegendikten shyqqan jándik deıdi.

Bul jolyndaǵysyn jaıpap, tikenge deıin typ - tıpyl etken Jambyldaǵy jaǵdaı. Shabyndyq jerdiń shańyn shyǵarǵan shegirtke otyz kúnde osy arany osylaı opaı-topaıyn shyǵarǵan.

QURMANÁLİ ÁMİRBAEV, Pıoner aýylynyń turǵyny:

- Myna qaptap jatqan shegirtkeni kórip tursyzdar. Buǵan endi dárilep jatyr, biraq sol dárilegeni azdaý bolyp jatyr. Aýylǵa bes on km ǵana qaldy shegirtkeniń jetpegenine. Jetse egistikti qurtady birinshiden. Jońyshqalyq bar aýyl mańynda. El shópsiz qalady.

Jambyl aýdany Kódeli jaıylymynda kóbeıgen zıankes jándik mundaǵylardy shoshyndyryp otyr. Jolyndaǵysyn jaıpap bara jatqan shegirtke ıek astynda turǵan egistikke jetse, eńbegimiz esh ketkeli tur deıdi. Aıtýlarynsha bir aı buryn paıda bolǵan zıankes osynda kóbeıip, qanattanyp kóship bara jatqan kórinedi.

BAQYTJAN BAIDOSOV, Jambyl aýdanynyń turǵyny:

- Olar endi seýip jatyr. Biraq dozasy az bolyp jatyr ma ushyp jatyr ólip jatqan joq. Bir kún jatady qaıtip tirilip ketip jatyr. Aýylǵa bes alty km qaldy ǵoı. Bul endi bıdaıǵa barady, myna jaqty bitirgennen keıin.

Alaıda mamandar eldiń bulaı alańdaýy negizsiz deıdi. Aıtýlarynsha marokkalyq shegirtke bes myń gektar alqapty jaılaǵan. Kóbeıýiniń basty sebebin bıylǵy aýa-raıymen baılanystyrady. Qazir qaýiptiń beti beri qarady deıdi.

JÁNİBEK KEŃESBEKOV, Respýblıkalyq fıtosanıtarlyq dıagnostıka jáne boljamdar ádistemelik ortalyǵy Jambyl oblystyq fılıalynyń dırektory:

- «Dokloprıd», «Kombat» degen preparattarmen dárileý jumystary júrgizildi. Olardyń áser etý kúshi shamamen 90-92 dep aıtýǵa bolady. Bular qazir jerde qımyldap júrgenimen, belsendiligin joǵaltyp otyr.

Mamandar dáriniń kúshi on shaqty kúnde áser etedi deıdi. Al ýlanǵan shegirtke ózge aýdanǵa kóshedi deý negizsiz dep sendiredi. Aıta keteıik Jambyl oblysynda «Marokkalyq», «Italályq prýs» jáne «Azıalyq shegirtke» keń taraǵan. Negizgi oshaǵy Qarataý bókteri. Mamandar segiz myń gektar jerge shegirtke qaýmalaıdy dep josparlaǵandaryn aıtady. Degenmen der kezinde dáriledik deıdi. Dármensiz degenge senbeıdi.

Al, Ońtústik Qazaqstandaǵy jaǵdaı tipti múshkil syńaıly. Shardara aýdanyndaǵy dıhandar shegirtke eńbegimizdi esh etti dep shyryldaıdy. Onda jurt qonǵan shegirtkeni qoldarymen ushyryp álek. Jaǵdaı ýshyqsa bıylǵy bitik shyqqan egistikke qýaný erterek degen el, shegirtke saldarynan aýyzǵa túskeli turǵan asta tók baılyqtan aırylamyz ba dep alańdaýly. Al, ázirge Shardaradan resmı jaýap joq.