Mamyr aıynyń 27 kúni Qazaqstan Respýblıkasynyń Ulttyq mýzeıinde «National Geographic-tiń» úzdik 50 sýreti» atty fotokórmeniń ashylýy boldy, - dep habarlaıdy Qamshy.kz Baq.kz – ke silteme jasap. 

Kórme «National Geographic Qazaqstan» jýrnalynyń tusaýkeser rásimi aıasynda uıymdastyrylyp, oǵan Qazaqstan Respýblıkasy Aqparat jáne komýnıkasıa mınıstri Dáýren Abaev, «National Geographic-tiń» Halyqaralyq dırektory Darren Smıt, osy jýrnaldyń marketıń dırektory Arıel Delor, basylymnyń Qazaqstan boıynsha dırektory Erkin Jaqypovtar qatysyp sóz sóıledi. Sonymen qatar Qazaqstan Respýblıkasynyń Parlamentiniń depýtattary Qýanysh Sultanov, Máýlen Áshimbaev bastaǵan halyq qalaýlylary da qatysty.

Jıynda sóz alǵan Qazaqstan Respýblıkasy Aqparat jáne komýnıkasıa mınıstri Dáýren Abaev halyqaralyq deńgeıdegi bedeldi basylymnyń Qazaqstanda shyǵarylýy erekshe oqıǵa dep atap ótti.

«Álemge tanymal basylymnyń bizdiń elge kelip, qazaq tilde shyǵýy otandyq aqparat salasy úshin jyldyń eleýli oqıǵasy dep bilemin. Tasyn túrtse tarıhy sóıleıtin, Altaı men Kaspııdiń arasyndaǵy Ulan-ǵaıyr jerimizdiń talaıdy tamsandyratyn tabıǵaty, máıekti mádenıeti, qaıtalanbas salt dástúri «National Geographic Qazaqstan» úshin taýsylmas taqyryp bolary sózsiz»,- dedi D.Abaev.

«National Geographic Qazaqstan» jýrnalynyń dırektory Erkin Jaqypov basylymnyń qazaqstandyqtar úshin mańyzdy ekendigine toqtalyp óttti. «Biz osy ýaqytqa deıin jýrnaldyń 5 sanyn shyǵardyq. «National Geographic Qazaqstan» jýrnaly Qazaqstanǵa kelýi arqyly oqyrmandar álemdik basylym materıaldaryn óz ana tilinde oqı alady. Bul jýrnal bizdiń elimiz úshin de kóp múmkindik ashyp bere alady. Máselen tarıh pen mádenıetke qatysty kez-kelgen taqyrypty ǵalamdyq deńgeıde kóterip, talqylaı alamyz», - dedi E.Jaqypov.

Sonymen qatar, jýrnaldyń tusaýkeserine arnaıy shaqyrylǵan, 1954 jyly «National Geographic» jýrnalyna shyqqan Fazıla Jańaltaı apa jıynǵa kelgen qaýymǵa aq batasyn berdi.

Kórmede talǵamy joǵary kelýshilerge 128 jyldyq tarıhy bar álemdik bedeldi basylymnyń álemdi ózgertken eń úzdik fotolary usynylady. Onda Stıv Makkarrıdyń dúnıeni sharlaǵan áıgili «Aýǵan qyzy» sýretinen bastap, Djeın Gýdolldyń ózindik qoltańbasy bar kadrlary, Tomas Aberkrombıdiń qaıtalanbas Mekkeniń sýreti qoıylyp, «National Geographic» tarıhyndaǵy basqa da tanymal foto-týyndylar pash etiledi. Bunymen qosa, kórmege kelýshiler foto-sýretterdi tamashalap qana qoımaı, kadrdan tys oryn alǵan oqıǵalar týraly da bilip, ár sýrettiń tarıhyna tereń úńile alady.

Uıymdastyrýshylardyń aıtýynsha, mundaǵy árbir foto adamǵa tereń oı salyp, dúnıege fılosofıalyq kózqaraspen qaraýǵa úndeıdi.

Esterińizge sala keteıik, «National Geographic Qazaqstan» jýrnaly alǵash ret elimizde bıylǵy jyldyń aqpan aıynan bastap jaryqqa shyǵyp keledi. Qazirgi kúni bedeldi basylymnyń ana tilimizdegi tórtinshi sany áziz oqyrmannyń qolyna tıdi.