Qyzylordalyq «Qaısardyń» bıylǵy «qara marjany» - Mamýtý Kýlıbalı qazaqqa kúıeýbala bolǵysy keletinin málim etti. Klýbtyń resmı saıtynda jarıalanǵan suhbatynda ol jańa komanda  týraly oıy men qazaq qyzyna ǵashyq ekenin aıtyp berdi.

«Shynyn aıtsam, qazaq tilin túsinbegendikten alǵashqy jyly óte qıyn boldy. Tipti, alty aıdan keıin ketip qalǵym da keldi. Biraq bertin kele úırenisip kettim. Qazir InshAllah, Qazaqstanǵa tolyq sińisip kettim. Tipti, bolashaq jarym da qazaqtyń qyzy ekenin aıtqym keledi», - dep aǵynan jaryldy Mamýtý Kýlıbalı.

Sportshynyń aıtýyna qaraǵanda, onyń pavlodarlyq Mádına esimdi arýmen kóńil jarastyryp júrgenine eki jyl bolǵan.

Tilshiniń «Qazaq tiliń qalaı?» degen suraǵyna fýtbolshy: «Qazaqstan - meniń altynshy elim. Ár eldiń chempıonatynda oınap júrip, birneshe tildi meńgerip aldym. Oryssha bilemin, fransýz, malı, aǵylshyn tilderine sýdaımyn. Túriksheni de túsinetin haldemin. Pavlodarda jurt kóbine orys tilinde sóılesedi. Sondyqtan, úırene almadym. Qyzylorda naǵyz qazaqı qalalardyń biri ǵoı. Kóp uzamaı, qazaq tilin de úırenip alarmyn», - dep jaýap berdi.

inform.kz