Jalpy mánerlep syrǵanaýdan álem chempıonaty alǵash ret 1896 jyly Sankt-Peterbýrgte ótken. Bıyl "Kúnshyǵys elinde" jalaýyn jelbiretti. Bul Japonıanyń osy sport túrinen álem chempıonatyn altynshy ret ótkizýi. Negizi, álem chempıonatyna Halyqaralyq kónkı sporty túrleri federasıasynyń (ISU) quramyna kiretin elder 1998 jyldyń 1 shildesine deıin týǵan sportshylaryn úkilep qosa alady. Naqtyraq aıtqanda, mánerlep syrǵanaýdyń tórt synyna (erler, áıelder, sporttyq jup, bı juby) ár memlekettiń bir sportshydan (juptan) qatystyrýyna bolady. Al keıbir memleketter buǵan deıingi álem chempıonattarynyń qorytyndysy boıynsha 2-3 sportshydan (juptan) qosýǵa quqyly. Mysaly, bizdiń el erler arasyndaǵy synǵa eki jigitimizdi qosýy tıis bolatyn. Biraq Sochı Olımpıadasynyń qola júldegeri Denıs Ten bıylǵy álem chempıonatyna barmady. Jaýapkershiligi mol maýsymnyń aıaǵynda tynyǵyp alǵysy kelgen sıaqty... ISU resmı saıtynyń málimdeýinshe, bıylǵy álem chempıonatyna 38 elden 177 sportshy (jup) qatysady eken. Keshe álem chempıonaty bastalyp, erler arasyndaǵy qysqa baǵdarlama syny ótti. Erler arasyndaǵy synǵa 32 sportshy qatysyp, bizdiń Abzal Raqymǵalıev 24-orynǵa ıe boldy. Sóıtip, erkin baǵdarlamada baq synaıtyn 24 sportshynyń qataryna ilikti. Ol qysqa baǵdarlamada 61,77 upaı jınady. Ázirshe birinshi oryndy 98, 21 upaımen japon jigiti Tasýkı Machıda ıelenip tur. Ispan úmiti Haver Fernandes (96,42 upaı) ekinshi orynǵa, al Japonıanyń taǵy bir sańlaǵy Iýdzýrý Hanú (91,24 upaı) úshinshi orynǵa ornalasty. Álem chempıony men júldegerleri juma kúni anyqtalady. Tengrinews.kz.