Qazaqstannyń Eýrazıalyq ekonomıkalyq odaqqa qatysýy respýblıkanyń egemendigine qaýip tóndirmeıdi, tek qana taza pragmatıkalyq ekonomıkalyq múddeni kózdeıdi. Bul týraly Qazaqstan Prezıdenti Nursultan Nazarbaev seısenbi kúni Gaagada ótken brıfıńte málimdedi.
"Integrasıa kedendik kedergilerdi joıýǵa múmkindik berip, básekege qabilettilikti arttyrady. Sondyqtan bizdiki taza pragmatıkalyq múdde - eldi damytý, ekonomıkany kóterý jáne İJÓ-ni ulǵaıtý. Al bizdiń saıası táýelsizdigimizge kelsek, ol myzǵymaıdy, Qazaqstan eshkimge egemendigin bermeıdi", - dep atap ótti Nazarbaev. Biraq Memleket basshysy Qazaqstannyń belgili bir ekonomıkalyq ókilettikterdi, mysaly, Eýropalyq odaqtaǵy sekildi ultústi organdarǵa beretinin aıtty. "Eýrokomıssıa kedendik máselelerdi sheshedi, saýda, tarıfter, munaı men gaz tasymaly, elektr energıasy, temir jol jáne avtomobıl joldary salasyn retteıdi. Bizdiń bolashaq odaqta barlyq másele konsensýstyq negizde sheshiletin bolady. Túpkilikti sheshim úshin barlyq úsh memlekettiń de kelisimi talap etiledi. Sondyqtan munda eshqandaı alańdaý bolýǵa tıis emes, bul barlyq memleketterge, ásirese daǵdarys jaǵdaıynda tıimdi. Integrasıalyq úderister ilgerileı beredi, bul da - bizdiń táýelsizdigimizdiń máselesi", - dep túsindirdi Nazarbaev. Prezıdent Ýkraınadaǵy oqıǵalardyń ıntegrasıalyq prosesterge áser etpeıtinin jáne Eýrazıalyq ekonomıkalyq odaqty qurý týraly negizgi shartqa qol qoıý jónindegi jumystardyń jalǵasatynyn málimdedi. Eske sala keteıik, quramyna Qazaqstan, Reseı jáne Belarýs enetin Eýrazıalyq ekonomıkalyq odaq 2015 jyldyń 1 qańtaryna qaraı qurylýy tıis. Nursultan Nazarbaev brıfıńte, sonymen birge, Qazaqstannyń ishki jáne syrtqy saıasaty týraly da aıtty. "Qazaqstannyń syrtqy saıasaty teńgerimdilik pen kópvektorlyqqa negizdelgen, al eldegi ishki ahýal tiline, dinine jáne mádenıetine qaramastan, barlyq azamattardyń teńdigi men quqyqtaryn saqtaýdy negizge alǵan. Bul búgingi álemde tynyshtyq pen turaqtylyqty qamtamasyz etýdiń basty faktory bolyp sanalady. Naq osy negizde ǵana memleket ornyqty damı alady. Praktıka bizdiń eldegi saıasatymyzdyń durystyǵyn taǵy bir ret dáleldeıdi. Damý úshin tatýlyq, kelisim, halyqtyń birligi kerek. Sol sebepti de men shet memleketterdegi áriptesterimniń barlyǵyn beıbit kelissózder júrgizý qajettigine úgittedim", - dedi ol.
