Almaty turǵyny eńbekaqysyn suraımyn dep, basshysynyń qolynan ólim qushqan, - dep habarlaıdy Qamshy.kz Tengrinews.kz –ke silteme jasap.

«Saparzan» JSHS dırektory óz jumysshysyna 1,5 mıllıon teńge qaryz bolǵan kórinedi. Atalǵan somany suraǵan jumysshysyn kompanıa basshysy qala syrtyna alyp shyǵyp, óltirip ketken.

Qylmystyq is materıaldarynda 2015 jyldyń maýsymynda kompanıa basshysynyń jumyskerin Almaty irgesindegi Turar saıajaıyna shaqyryp, sol jerde taǵy bir sybaılasy ekeýi oǵan araq ishkizgeni, artynan qol-aıaǵyn skochpen baılap, aýzyna konák quıyp tunshyqtyrǵany aıtylady.

Óltirilgen jumysshynyń múrdesin de sol saıajaı aýmaǵyna kómip ketken. Kóp uzamaı kompanıa basshysy da onyń sybaılasy da qolǵa túsken.

Aýdanaralyq mamandandyrylǵan qylmystyq sot sheshimimen eki kúdiktiniń de qylmysy dáleldenip, olardy 17 jyl bas bostandyǵynan aıyrý týraly úkim shyqty. Jazasyn qatań rejımdegi túzeý mekemesinde óteıtin olardyń múlki de tárkilenetin boldy.