Anyǵynda, ázir bizge Táýelsizdiktiń ár jyly qymbat. Jylǵa jyl qosylǵan saıyn biz komýnızm elesinen, «Qyzyl ımperıa qaıta tirilýi múmkin» degen úreıden alystaı túsemiz. Ýaqyt ótken saıyn mundaı boljamdardyń qıýýy qashyp, qısyny ketedi degen úmit bar. Demek, bizge keregi ýaqyt…

Joq, ras. Táýelsizdiktiń ár jyly qymbat biz úshin.

Bıyl Táýelsizdiktiń 25-shi jyly . Jeltoqsanda toılaımyz. Toılaýǵa tıispiz. KSRO-nyń qulaǵanyna da dál osy aıda – jeltoqsanda 25 jyl tolady. Bul da toı. Biz úshin toı.

KSRO-nyń qulaǵanyna ólgenshe ókinetin bir el bar.

Reseı. İrgemizde otyr. Ókinetinin sońǵy kezderi jasyrmaı aıtýda. Anaý-mynaý emes Pýtınniń aýzymen…

«KSRO-nyń kúıreýin HHİ ǵasyrdaǵy eń uly tragedıaǵa» teńegen osy kisi. Keıin taǵy aıtty. Qudaı biledi, áli de aıtady…

Aıta bersin. Armanyn bilemiz. Oryndalmaıdy. Oryndalmaıtynyn biz emes Bjezınskıı aıtqan. Ańyzǵa aınalǵan «Uly shahmat taqtasyn» oqyǵanyńyz bar ma? Mine, osy kitaptyń avtory.

«Meni Vladımır Pýtınniń memleketti bıleý stıli alańdatady. Onyń sózinen soǵystyń sarynyn, orys shovınızminiń rıtorıkasyn ańǵaramyn. Ol «qyrǵı qabaq» soǵysqa qaıta oralǵysy keledi. Biraq, ol keshigip qaldy. Pýtın qazirgi tarıhtyń betburysyn, baǵytyn ózgerte almaıdy», – degen Bjezınskıı.

Ras aıtady. Oılap qaraǵanda adamǵa «orys álemi» degen ıdeıanyń ózi ýtopıa. Bul ıdeıa qaıda barsa da qarsylyqqa ushyraıdy endigi.

Qarsylyqtyń qandaı bolatynyn Ýkraına kórsetip berdi.

KSRO-nyń qulaǵanyna shırek ǵasyr. Qulady, qırady, umytyldy. Biraq, keıbireýlerdiń sanasynda ótken kúnge degen saǵynysh áli de saqtalǵan.

Bir jolǵy jıynda Qazaqstan men Reseıdi «baýyrlas elder» dep sanaıtyn saıasattanýshynyń sózin tyńdadyq. Atyn aıtpaı-aq qoıalyq. Sózi mańyzdy.

Ol ne dedi?

«Qazaqstandyq qoǵamda áli de bolsa «sovetskıı» brendterdiń yqpaly kúshti. Olarǵa degen saǵynysh sezilip turady. Ózge postkeńestik elderde mundaıdy múlde baıqamaısyń. Buǵan ne sebep?

Aıtalyq, Almatydaǵy «Koka-kola» zaýyty óz óniminen tys «Býratıno» lımonadyn óndiredi. «Býratınonyń» keńestik brend ekeni barlyǵymyzǵa belgili. Atalǵan ónimdi óndirý arqyly naryqty jaýlaıtyndaryna senimdi bolǵasyn kompanıa osy sýsyndy shyǵara bastady. Qazaqstanda «sovetskıı», «rýsskıı» dep atalatyn ózge ónimder de jetip artylady. Mundaıdy Ýkraınada elestetý qıyn. Bul ótken kúnge degen saǵynyshtyń kórinisteri bolar. Mysalǵa, men jaqynda ǵana «Sovetskaıa mýsýlmanskaıa» dep atalatyn jergilikti shujyqty satyp aldym. Keńes ókimetiniń dinge degen kózqarasy qandaı bolǵandyǵyn eskersek, muny naǵyz paradoks dep baǵalaýǵa bolar edi…».

Siz qalaı oılaısyz, saıasattanýshynyń sózi ras pa? Ras bolsa, saǵynyshtyń tabyn qalaı joıýǵa bolady? Álde bul áli de bolsa ótken kúnniń elesinen aryla almaı júrgen azǵantaı toptyń sandyraǵy ma?

Topshylarsyz.

Derekkóz: kaz.365info.kz