Batys Qazaqstan oblysynyń Bókeı ordasy aýdanynyń Shońǵaı aýylynyń mańyna 27 naýryzǵa qaraǵan túni Reseıdiń Kapýstın Iar polıgonynan ushyrylǵan meteorologıalyq "MN-300" zymyrany qulady dep habarlaıdy aqparat agenttikteri. Bókeı ordasy aýdanynyń ákimi Nurlan Rahymjanovtyń aıtýynsha, zymyran 27 naýryzǵa qaraǵan túni jergilikti ýaqytpen saǵat 01.00 shamasynda qulaǵan. Tótenshe oqıǵadan eshkim zardap shekpegen. Zymyrannyń uzyndyǵy 7 metr, eni 45 santımetrdi quraıdy. Byltyr jazda reseılik "Proton-M" zymyran tasyǵyshy Baıqońyrdan usha bergende apatqa ushyrap, jarylyp ketken edi. Apat saldarynan «Proton-M» zymyran tasyǵyshynan birneshe júz tonna ýly otyn – geptıldiń tógilýi Qazaqstan qoǵamynda qarsylyq aksıalaryn týǵyzǵan.

Azattyq radıosy