Qaraǵandydaǵy Erkindik aýyly tutasymen qorshaýǵa alynyp, karantın jarıalandy. Óıtkeni, eki adamnyń sibir jarasynan qaıtys bolǵany rastalyp otyr, - dep habarlaıdy Qamshy.kz 31 arnaǵa silteme jasap.
Sıyr etine jasalǵan alǵashqy saraptama qorytyndysy osyndaı boldy. Biraq úmitterin úzbegen oblys basshylary áli de Astanadan kelgen mamandardyń jaýabyn kútemiz deıdi. Qazir aýylǵa syrttan adam kirgizilmeı, jáne ishten shyǵarylmaı jatyr.
Qaıtys bolǵan 33 jastaǵy Aıgúl Ahmetova sol kúni sibir jarasyn juqtyrǵan sıyr etin týraǵan deıdi jaqyndary. Týystarynyń baıqaýsyzda qolyn pyshaqpen kesip alǵan áıelge qaýipti indet sol kezde juǵyp ketýi múmkin degen kúdikteri basym. Kóz jumǵan jaqyndaryn tabytpen jerleıtinderine de kóngen jaqyndary máıitterdiń áli jetkizilmegenine ashynady.
ǴABIDEN AHMETOV, marqum Aıgúl Ahmetovanyń ákesi:
-Ol balanyń denesi bolmaıdy, prah qana bolady. No vse takı sonyń ózin bermeı jatyr ǵoı. Qandaı sharýa ol?!
Belgisiz indettiń oshaǵy shyqqan Erkindik aýylyna kirý qıyn. Eldi meken kireberisinde jergilikti jaýaptylarmen birge, arnaıy qurylǵan komısıa men epıdemıologtar jumys atqarýda.
MEIİRJAN AQJANOV, Jetekshi maman:
-İshke kirgen mashına syrtqa shyqqan mashına da. Infeksıa taramas úshin. Keýip ketpes úshin sý seýip turamyz.
Shekteý jarıalanǵaly beri aýylǵa kirýdi aıtpaǵanda, shyǵýdyń ózi muń. Jaqyndarynan aıyrylǵan eki birdeı otbasyna adamdar kóńildi úıde emes, dalada aıtýǵa májbúr. Tipti, marqumdardyń deneleriniń kúlin de syrtqa shyǵarýdan ózge amalymyz joq deıdi.
Erkindik aýylynyń atqaminerleri 50 shaqyrym jerge deıin shekteýdi keshe keshki saǵat altydan bastap jarıalady. Jergilikti atqaminerler aýyldan eshkimniń kirip-shyqpaıtynyn qatań baqylaıdy. Mundaǵy et, sút ónimderiniń saýdaǵa qoıylýyna da tyıym salyndy.
MUHIT MUHTAROV, Shet aýdany ákiminiń orynbasary:
- Turǵyndarmen túsindirý jumystary júrgizildi. Dvorovyı obhod úsh márte jasalyp otyr. Ol jańaǵy medısına, vetslýjbanyń tarapynan.
Emhanaǵa túsken toǵyz naýqastan sibir jarasynyń belgileri anyqtalǵanyn oblystyń sheneýnikteri de rastap otyr. Biraq sońǵy dıagnoz tek respýblıkalyq mamandardyń jaýabynan soń qoıylady deıdi.
SHAGÝRASHID MAMALINOV, Qaraǵandy oblysy ákiminiń aýylsharýashylyq jumystary boıynsha orynbasary:
-Qorytyndy nátıjesin qolymyzǵa erteń alamyz degen úmittemin. Biraq birinshi saraptama qorytyndysy sibir jarasyn kórsetip tur. Ázirge atalmysh eldimekende aldyn alý jumystaryn atqaryp jatyrmyz.
Biraq qaıǵy jutqan erkindiktegiler shendilerdiń sózine ılanbaıdy. Aýyldan shyǵa almaı beınejazbany ýatsap arqyly jibergen halyq keselge qarsy ekpeler barlyǵyna birdeı jasalmaǵanyn aıtady.
Ázirge Qaraǵandydan 200 shaqyrymdaı jerdegi Erkindik aýylyna karantın 15 kúnge qoıyldy. Biraq kesel rastalsa, sheneýnikter ýaqytyn uzartamyz dep otyr.
Al qazir oblystyq juqpaly aýrýlar aýrýhanasynda Sibir jarasyna qarsy emdi Kajkenov J.S. - 1968 j., Bısenbaeva M.T. - 1971 j., Boqaeva G.S. - 1973 j., Sıazbaı N.K. - 1992 j., Muhamedjanov M.S., - 2006 j. men Baqaı S.S. - 1963 j. alyp jatqany belgili. Al qaıtys bolǵan Káken Qajkenov pen Aıgúl Ahmetovanyń jerleýi erteń týǵan aýyldarynda ótedi.
