Qytaı qazaqtarynyń arasynda aty tanylyp qalǵan qolóner seriktestiginiń biri - «Muraǵat» seriktestigi. Munda qazaqtyń ulttyq kıiminen bastap, ózge de buıymdary ulttyq naqyshpen kómkerilip, kópke jol tartady. Seriktestiktiń ónimderi de suranysqa ıe. Arǵy bette qazaq qolónerin nasıhattap júrgen sol seriktestiktiń bas meńgerýshisi Gúlmıra Turǵynqyzyn az-maz áńgimege tartqan edik.
- Sizdi eldiń bári "On saýsaǵynan óner tamǵan" dep jatady, oıý-órnekke, ulttyq naqyshtaǵy tiginshilikke qalaı keldińiz?
- Men osy ónerdi bala kezimnen anamnyń tynym tappaı bizdiń turmysymyzdyń qajeti úshin eńbek etkeninen kórip óstim, sol kisiden kóp nárse úırendim. Sol kezde oılaýshy em, "anamnyń osy kásibin damytyp jurtqa tanytamyn, jetildiremin" dep. 2012 jyldan bastap shynaıy qolǵa aldym, jaı ǵana kásip úshin emes, aqshasy úshin emes, ózime shart qoıyp, "qazaqtyń urpaqtan-urpaqqa jetken oıýy men órnegin naryq arqyly keleshekke amanattaýǵa úles qosamyn" dedim.
Qolǵa alǵan kásibimnen halyqtyń kóńili men qajetinen shyǵatyn, qazaqı ulttyq oıý-órnektegi kıim-keshekter, qolóner buıymdary, kestelengen buıymdar, toqylǵan buıymdar sıaqty kúndelikti turmysta, meıli oıyn-saýyqta bolsyn, qoldanylymy joǵary ónimderdi óndirýdi maqsat tuttym. Ónimderim tutas elge taralsa, qajetine jarasa dedim.
- Qazaqy naqyshtaǵy qandaı buıymdardy óndiresiz?
Seriktestiktiń negizgi óndiretin ónimderi - ulttyq kıim-keshekter, qolóner buıymdary, kestelik buıymdar, marjannan jasalǵan buıymdar jáne toqymashylyq buıymdar. Sonymen birge ónimderdi ınternette jarnamalap jáne ınternette satý jumystaryn qolǵa alyp jatyrmyz.
- Seriktestik qashan, qalaı quryldy? Sol týraly da aıta otyrsańyz.
- "Muraǵat" qolóner buıymdar shekteýli seriktestiginiń irgesi 2014 jyly naýryzdyń 23-i kúni qalandy. Meniń joǵary mektepte oqyp jatqan inim Nurdyn Turǵynuly qysqy demalysqa kelip otbasymyzben aqyldasyp, anamnyń tikken kıimderiniń atyna marka alýdy aıtty. Bul bastama otbasyndaǵy jandardyń birden qoldaýyna ıe bolyp, Nurdyn kıim-keshek markasyn ótinish etip aldy. Osylaısha Allanyń qoldaýymen, otbasyndaǵy ata-anamnyń zeınetaqysyn alyp jumys bastadyq. Men jáne anam zattyń óndirisine jaýapty boldy, ákem qazynany basqardy. Nurdyn Qytaıdaǵy barlyq qazaq ulty jıi baratyn oryndardy aralap júrip, zattardy satty. 2013 jyly Nurdyn joǵary mekteptegi oqýyn aıaqtap qaıtyp keldi. Sol ýaqytta men Nurdynǵa ózimniń úlken jumys istegim keletinin aıttym, ol kelisip, menimen birigip, seriktestik quryp jumys isteýge qosyldy. Jumysymyz alǵa basyp, maqsattarymyz oryndalyp jatyr.
- Seriktestigińizdiń ataýyn nege "Muraǵat" dep qoıdyńyz?
Seriktestiktiń aty bulaı tekten tek qoıylǵan joq. Anam kishkene kezinen ulttyq kıim-keshek pen keste tigýmen boı jetken, keıin 1997 jyldan bastap otbasynda otyryp jumys bastap istegen, anamnyń ereksheligi qazaqtyń oıý-órnegin oıdan shyǵaryp jasampazdyq isteýge talpynǵan, biraq úlkeıtip isteýge otbasylyq jaǵdaıymen sharasy bolmady. Anamnyń osy jumysyn bala kezimnen armandadym, anamnan mura bop qalǵan osy kásipti keıingi urpaqtarǵa máńgi jalǵasa bersin degen nıetpen "Muraǵat" dep at qoıyp, "Muraǵat" qolóner buıymdar shekteýli seriktestigin qurdym.
Negizgi mamandyǵyńyz qandaı? Tiginshilikti arnaıy oqyǵan ba edińiz?
Men 2006 jyly orta mektepti bitirgennen keıin mýzykany oqydym, 2008 jyly Qazaqstanǵa kelip, Qurmanǵazy atyndaǵy ulttyq Konservatorıada bilim aldym. Biraq, sol kezde syrttaı turmys-tirshilik úshin ajarlandyrý, shash jasaý jumystaryn qosymsha istep júrgen kezim de boldy. 2012 jyly kásip ashyp jumys jasaý oıyma keldi. Aýylǵa qaıtyp kelip shash sándeý ortalyǵyn ashtym, biraq ajarlandyrýdan góri úılengen qyz-jigitterge ózge qajettilikter kerek bolǵan soń, shashtarazdy kıim-keshek ortalyǵyna ózgerttim.
- Bul ónimderińizge Qazaqstannan tapsyrys berýshiler bar ma?
- Árıne, ashyq naryq bolǵan soń, saýda-sattyq bolǵan soń túrli tapsyrystar túsip jatady. Ónimderimizge suranys joǵary. Elge tanymal, óner, mádenıet qaıratkerleri úshin de kıim tiksek pe degen de josparymyz bar. Jaqynda ǵana 65 jasyn dúrkiretip atap ótken aqyn, aıtys óneriniń janashyry Júrsin Erman aǵamyzdyń úıinde arnaıy qonaq bolyp, ózimiz tikken shapandy syıǵa tartý úlken mártebe boldy biz úshin. Ulttyń sózin ustaǵan aǵalarymyz ulttyq naqyshta tigilgen ónimderimizge óz baǵasyn berip jatsa, qalaı qýanbaımyz?
Kórmelerge qatysyp turasyz ba?
Qazaqstanda kórmeler jıi bolyp turady. Shamamyz kelgenshe qatysyp turamyz. Qytaıda ótkiziletin halyqaralyq Azıa-Eýropa kórmelerine de qatystyq. Alǵa qoıǵan maqsat, josparlarymyz – óndiristi keńeıtý, ulttyq brendti nasıhattaý. Ulttyq ónerdi arqaý etkennen keıin ulttyń rýhanıatyna, sol salada eńbek etip júrgen azamattarǵa da qol ushyn sozsaq, demeý bolsaq degen de úmitimiz bar.
Suhbattasqanyńyzǵa raqmet.
Suhbattasqan: Erlan Tóleýbaı
