Memleket basshysy Nursultan Nazarbaev Qytaı Halyq Respýblıkasynyń tóraǵasy Sı Szınpınmen kezdesti, - dep habarlaıdy Qamshy.kz Aqordaǵa silteme jasap.
Kezdesý barysynda Nursultan Nazarbaev pen Sı Szınpın ekijaqty yntymaqtastyqty damytýǵa qatysty, onyń ishinde saýda-ekonomıkalyq, ınvestısıalyq, otyn-energetıkalyq, tranzıt-kólik jáne mádenı-gýmanıtarlyq salalardaǵy keń aýqymdy máselelerdi talqylady.
Sondaı-aq memleketter basshylary eki eldiń Shanhaı yntymaqtastyq uıymy aıasyndaǵy ózara is-qımylynyń negizgi baǵyttaryn qarastyryp, óńirlik jáne halyqaralyq kún tártibindegi birqatar jaıttar jóninde pikir almasty.
Qazaqstan Prezıdenti Nursultan Nazarbaev Sı Szınpındi Qytaı komýnıstik partıasynyń qurylǵanyna 95 jyl tolýymen quttyqtady. Partıanyń kóshbasshylyǵymen Qytaı halqy búgingideı bıikterge jetip, eldi álemniń eń damyǵan memleketteriniń qataryna qosý mindetin alǵa qoıyp otyrǵanyn atap ótti.
Sı Szınpın táýelsizdik jyldary Qazaqstan Nursultan Nazarbaevtyń basshylyǵymen álemdik saıası úderisterge belsene qatysyp, egemendi damý men áleýmettik-ekonomıkalyq reformalar jolynda eleýli tabystarǵa jetkenin atap ótti. Sondaı-aq QHR tóraǵasy Qazaqstannyń Astanada EKSPO-2017 halyqaralyq kórmesin ótkizý jónindegi bastamasyna qoldaý bildirdi.
Áńgimelesý barysynda taraptar kólik jáne komýnıkasıa salasyndaǵy ekijaqty yntymaqtastyq áleýetiniń joǵary ekenine nazar aýdaryp, «Nurly jol» jáne «Jibek jolynyń ekonomıkalyq beldeýi» baǵdarlamalarynyń bir-birin ózara tolyqtyryp turatynyna toqtalyp ótti. Sondaı-aq eki el aýmaǵy arqyly ótetin kólik dálizderin odan ári nyǵaıtý jáne damytý qajettigi aıtyldy.
Budan bólek, Nursultan Nazarbaev pen Sı Szınpın Qazaqstan men Qytaı arasyndaǵy taýar aınalymyn jańa sapaly deńgeıge kóterip, onyń kólemin ulǵaıtýǵa nıetti ekendikterin bildirdi. Eki memlekettiń kóshbasshylary agroónerkásip salasyndaǵy uzaq merzimge arnalǵan seriktestikti odan ári nyǵaıtý jóninde ýaǵdalastyqqa qol jetkizdi.
Esterińizge salsaq, Ózbekstanda Shanhaı yntymaqtastyq uıymy elderi basshylarynyń bas qosýy ótýde.
