Kesheli beri ózenniń birneshe jerinen tasyǵan sý Óskemen qalasynyń shetindegi 7 saıajaıdy basyp qaldy, - dep habarlaıdy Qamshy.kz «Habar» arnasyna silteme jasap.
Al Ablaketka shaǵyn aýdanyndaǵy saıajaıdan 87 adam evýakasıalandy.
Oljas Kereıhan, tilshi
-Oblysta sý tasqyny qaýpi áli tolyq seıligen joq. Sońǵy on kúnde aımaqtaǵy sý qoımalary men gıdrotehnıkalyq nysandardaǵy sýdyń mólsheri eń joǵary deńgeıge jetti. Qazir «Buqtyrma», «Shúlbi» jáne «Óskemen» sý toraptarynda sekýndyna 2000-3000 tekshe metr sý túsip jatyr. Osy kóp mólsherde jiberligen sý Ertis ózeniniń arnasyn tolyqtyryp jatyr.
Sondyqtan oblystyń Tótenshe jaǵdaılar qyzmeti kúsheıtilgen jumys kestesine kóshti.
Departamentte arnaıy shtab qurylyp, jedel jeli iske qosyldy.
Anastasıa Sklár, SHQO TJD baspasóz hatshysy
-Eń qaýipti degen 20 aýmaqta baqylaý bólimderi ornalasqan. Iaǵnı qutqarýshylar monıtorıń jasap, sý deńgeıin qadaǵalap otyr. Tasqyn qaýpi joǵary aımaqtardaǵy turǵyndarmen túsindirý jumystary júrgizilip jatyr. Degenmen halyqqa asa saq bolýdy, ózenge jaqyndamaýdy suraımyz.
Ertis ózeniniń kóterilýine sońǵy birneshe táýlikte tolsassyz jaýǵan jańbyr da óz áserin tıgizdi. Ásirese jaǵaǵa jaqyn jerdegi saıajaılarǵa sý jaıyldy.
Al búgin Abalketka shaǵyn aýdanyndaǵy baý-baqsha seriktesterin sý basty. Birden qalalyq tótenshe jaǵdaılar bóliminiń jeke quramy men jergilikti polısıa bóliminiń qyzmetkerleri jumyldyryldy.
Qazir 4 qaıyq pen 10-nan astam tehnıka jumys istep jatyr.
Oljas Kereıhan, tilshi
-Jalpy qalada 20-dan asa aýmaqty Ertistiń sýy basýy múmkin degen qaýip bar. Olardyń kóbi saıajaılar ornalasqan ýaqytsha qonystar. Sondyqtan sý jaıylýy múmkin degen aýmaqtarǵa bógetter turǵyzylyp, jaǵalary bekitilip, kezekshilik qoıyldy.
