Jambyl oblysynyń turǵyndary qyzyl sýmen alysyp álekke túsip jatyr. Talas arnasynan asyp, júzdegen úıdiń aýlasyn basyp qalǵan. Ásirese ózen jaǵalaı jaıǵasqan jurt janyn shúberekke túıip otyrýǵa májbúr. Sebebi kún ótken saıyn asaý ózenniń jıegi orylyp, baspanalarǵa úlken qaýip tóndirýde. Al sheneýnikter apatty jaǵdaıdyń týyndaýyn Qyrǵyzstandaǵy Kırov sý qoımasynan kóp mólsherde sý jiberilýimen túsindiredi, - dep habarlaıdy Qamshy.kz KTK arnasyna silteme jasap.
Talastan aqqan asaý sý turǵyndardyń esinin aldy. Qazir ózen arnasyna syımaı, osy mańdaǵy el-jurtty álekke salýda. Máselen, Tekturmas aımaǵyndaǵy júzge jýyq úıdiń aýlasyn sý basyp qalǵan. Qarasha jınalǵan sýdan qutyla almaı zar jylap otyr.
Talasty jaǵalaı qonystanǵan turǵyndar bir jetiden beri kirpik ilmeı júr. Óıtkeni ózenniń jıegi kún sanap jyrylyp, úılerdi shaıyp ketý qaýipi tur. Ekpinmen aqqan sýdyń kúshtiligi sonsha, taldy tamyrymen qoparýda.
Gúlbaıra Túlekbekova, Taraz qalasynyń turǵyny:
-Myna Talastan 20 metr qashyqtyqta edik. 20 metr qashyqtyń bir-aq saǵatta úıimizge jetip keldi. Sol anaý jerde turǵanda biz ákimdikten kómek suradyq. Myna Talastyń jaǵasyn biz, kúndiz-túni qaraýyldaımyz. Uıyqtamaımyz biz túnimen.
Al, jaýapty mamandar jaǵdaıdyń ýshyǵýyn Qyrǵyzstandaǵy Kırov sý qoımasyndaǵy sýdyń shekti deńgeıge jetýmen túsindiredi. Ondaǵy sý erneýinen asyp, Tarazdy basyp qalmas úshin, Talas ózeni arqyly kóp mólsherde sý bosatylǵan eken. Biraq Shý-Talas baseınniń basshysy tótenshe jaǵdaıdyń bolýyna Qyrǵyzstandaǵy áriptesterin kinálaýda. Iaǵnı, bıyl jaýyn-shashynnyń jyldaǵydan kóp ekenin bile tura, der kezinde Talastan sý tastalmaǵan. Al, ózderi eskertýlerin elemegen aıyrqalpaqty aǵaıyndardyń áreketin túsinbeı dal.
Jumabek Muhataev, Shý-Talas basseıindik ınspeksıasynyń basshysy:
-Olar bizdi tyńdamady, sýdy qysyp jibermeı qoıdy. Al, sý qoımasy ábden toldy. Bir aı buryn dabyl qaǵyp, birneshe ret hat jazdyq, tym-tyrys jatyp aldy. Sodan bir kúni eskertpesten sýdy jibere saldy. Ózimiz Talas arqyly sekýntyna 70-80 tekshe metr sý qabyldap júrsek, olar 210 tekshe metrdi bosata saldy. Nege bulaı etkenderin túsinbedik.
Degenmen qos taraptyń túsinispeýshiligi Úkimettik deńgeıde sheshilipti. Qazir Talas arqyly sekýndyna 150 tekshe metr sý tastalýda. Biraq, onyń ózi jurttyń mazasyn qashyryp otyr.
Kırov sý saqtaý qoımasynyń jalpy syıymdylyǵy 550 mln. tekshe metr. Osydan onshaqty kún buryn mundaǵy sýdyń deńgeıi 548 mln. tekshe metrge deıin kóterilip, tómendegi Taraz qalasyna úlken qaýip tóndirgen. Apattan qaýiptengen mamandar Talas ózeni arqyly qoımadaǵy sýdy tómen qaraı tastaǵan. Iaǵnı, sodan beri mundaǵy sýdyń deńgeıi 530 mln. tekshe metrge tómendedi. Qazir eshqandaı qaýip joq dep sendiredi atqarýshy bılik.
