5 mamyr kúni Aqtóbe qalasyndaǵy lańkestikti uıymdastyrýǵa qatysyp, orta jolda raıynan qaıtqan kúdiktiniń biri Azamat Abdrahmanovty polısıa 7 mamyr kúni Aqtóbe oblysy Shubarshy aýylynan ustaǵan, - dep habarlaıdy Qamshy.kz Azattyqqa silteme jasap.
Bes jyl buryn osy aýylda polısıa men teris aǵymdaǵylar arasynda qaqtyǵys bolǵany belgili.
Qazaqstan ishki ister mınıstri Qalmuhanbet Qasymov buǵan deıin Aqtóbede 2016 jyly maýsymnyń 5-i kúni jasalǵan qarýly shabýyl jospary jaıly «aldyn ala bilgen, biraq sońǵy sátte aınyp qalǵan» jıyrmadan astam adam anyqtalǵanyn málimdegen. Biraq olar jaıly tolyq resmı aqparat joq. Aqtóbedegi shabýyldardan keıin ustalyp, qazir tergeý abaqtysynda otyrǵandardyń biri – Shubarshı aýylynyń týmasy Azamat Abdrahmanov.
Aqtóbe oblysy Temir aýdany Shubarshı aýylyndaǵy 57 jastaǵy Alpamys Abdrahmanov ákesin izdep jylaǵan úsh jasar nemeresi Abdýlázızdi «papań jumysqa ketti» dep aldaýsyratyp, jubatyp júr. Abdýlázız ben áli jasqa tolmaǵan Ázızanyń ákesi - Alpamys Abdrahmanovtyń úlken uly Azamat Abdrahmanovty quqyq qyzmetkerleri maýsymnyń 7-si keshkisin osy úıden ustap, oblys ortalyǵyna alyp ketken. Úı-ishiniń aıtýynsha, qazir ol Aqtóbedegi tergeý ızolátorynda qamaýda otyr.
Qamaýda otyrǵan Azamat Abdrahmanovtyń úsh jasar uly Abdýláziz ben ákesi Alpamys Abdrahmanov.
Azamat Abdrahmanovtyń kelinshegi 22 jastaǵy Baqytgúl Nurqasymova kúıeýiniń Aqtóbedegi páterden maýsymnyń 5-i kúni kúndizgi saǵat on birdiń shamasynda «qonaqqa baramyn» dep shyǵyp ketkenin aıtyp berdi. Tús áletinde úıge oralǵan kúıeýi kelinshegine «qazir aýylǵa ketemiz» degen soń, otbasy shuǵyl jolǵa shyǵyp, tús aýa Shubarshıge jetken.
- Ekeýmiz oǵan deıin aýylǵa oraza kezinde baramyz dep josparlaǵanbyz. Óıtkeni, jaldap otyrǵan páterdiń aı saıynǵy 50 myń teńge tólemaqysyna aqsha jetpeı qınalyp júrgenbiz. Azamattyń turaqty tabysy da bolmady, - deıdi Baqytgúl Nurqasymova.
Kelinshektiń aıtýynsha, maýsymnyń 5-i kúni Aqtóbede jasalǵan qarýly shabýylǵa qatysqandarmen kúıeýiniń baılanysy bolǵanyn bilmegen.
- Jol-jónekeı maǵan syr bildirgen joq. Azamattyń álgi adamdarmen birge bolyp, aqyrǵy sátte oıynan aınyp qalǵanyn tek maýsymnyń 7-si kúni keshki saǵat toǵyz jarymdarda ony úıden polısıa ustap áketkennen keıin ǵana bildik, - deıdi Baqytgúl.
Alpamys Abdrahmanovtyń aıtýynsha, 1988 jyly qyrkúıektiń 8-i dúnıege kelgen Azamat pen Amanat esimdi egiz ul – osy shańyraqtaǵy úsh balanyń úlkeni. Amanat qazir otbasymen birge Aqmola oblysynda, al úıdiń kenjesi Salamat Shubarshıde, ákesiniń qolynda turyp jatyr. Azamattyń anasy Názıpa osydan 10 jyl buryn dúnıe salǵan. Shubarshıdegi kórshileri Abdrahmanovtar otbasynyń úsh ulyn temeki men ishimdikten aýlaq, minezderi birtoǵa jigitter bolatyn dep sıpattaıdy.
«Uly qabyrǵa» qytaı-qazaq birlesken kompanıasynda jumysshy bolyp istegen Alpamys Abdrahmanov bıylǵy jyldyń basynda jumystan qysqaryp qalǵan soń, bir úıli jan kishi uly Salamattyń 60 myń teńge jalaqysyna qarap qalǵan. Jańajoldaǵy munaı kompanıalarynyń birinde elektrık bolyp istegen, keıin qysqartýǵa túsken Azamat ta bul kezde úıde jumyssyz otyrǵan. Osydan tórt aı buryn Azamat áıeli jáne eki balasyn alyp Aqtóbege kóshken.
- Aýyldan oǵan jumys tabylmady jáne ákesi de jumyssyz qalǵan soń, úıdegilerge masyl bolǵysy kelmedi. Onyń ústine meniń densaýlyǵymdy oılady. Byltyr júregime kúrdeli operasıa jasalǵan. Qazir júregim tym baıaý, mınýtyna ári ketse 30 ret qana soǵady. Únemi dárigerdiń baqylaýynda bolýym kerek. Al Shubarshıde kardıolog maman joq, tek qalada bar, - deıdi Azamattyń áıeli Baqytgúl.
Biraq Aqtóbege kóship barǵan jigitke ol qaladan da turaqty jumys tabylmaǵan.
- Bazarda ózi sıaqty dindar jigittermen birge qol telefonyn satyp júrgen. Tapqan-taıanǵany aı saıyn páteraqyǵa tóleıtin 50 myń teńge men as-sýynan aspaıtyn. Balama advokat jaldaıtyndaı da shamamyz joq, - deıdi ákesi Alpamys Abdrahmanov.
Úı-ishindegiler Azamat Abdrahmanovtyń osydan bes jyldaı buryn namazǵa jyǵylǵanyn aıtady.
Shubarshı aýyldyq okrýginiń ákimi Azamat Óserbaev 2011 jyly shilde aıynda osy aýylda dindar top pen polısıa arasynda 17 adamnyń (beseýi – polısıa ókilderi) qazasyna sebep bolǵan atys oqıǵasynan keıin eldi mekendegi «ózge dinı aǵymdaǵy» azamattar erekshe nazarda ekenin aıtyp berdi. Ákim «olardyń betin ózge aǵymnan Ábý Hanıfa mázhabyna burýymyz kerek» dep sanaıtyn álgi adamdardyń arasynda Azamat Abdrahmanov ta bolǵan.
Óserbaevtyń sózinshe, bıyl maýsymnyń 5-i kúni «Aqtóbede atys bolypty» degen sýyt habardy estigen boıda ol aýyldaǵy din jolyna túsken jigitterdi túgendep shyqqan. «Alpamys aǵaıdyń balasy sol kúni Shubarshıge otbasymen birge oralǵanyn estip, alańsyz otyrǵam» deıdi aýyl ákimi.
- 2011 jylǵy oqıǵadan soń dindar turǵyndardyń bárin esepke alyp, únemi baqylap otyramyz. Bul topta eńbekke qabiletti, biraq jumyssyz júrgen 28 adam bar. Joǵarǵy jaqtan eń birinshi kezekte solardy jumysqa ornalastyrý týraly tapsyrma aldym. Jergilikti munaı kompanıalarymen baılanysyp otyrmyn. Oryn bosaǵan jaǵdaıda eń aldymen osylarǵa basymdyq beriledi, - deıdi Shubarshı aýyldyq okrýginiń ákimi.
Aqtóbede maýsymnyń 5-i eki qarý dúkeni men ulttyq gvardıanyń áskerı bólimine qarýly top shabýyl jasady. Shabýyldar saldarynan jeti adam: úsh áskerı jáne tórt beıbit turǵyn qaza tapqany habarlandy. Shabýylǵa kúdiktilerge qarsy arnaıy operasıa birneshe kúnge jalǵasty. Resmı málimet boıynsha, 18 kúdiktiniń kózi joıylyp, 9-y qolǵa túsken.
Qazaqstanda sońǵy ýaqyttaǵy eń úlken qantógiske aınalǵan oqıǵalardyń biri – Aqtóbede maýsymnyń 5-i kúni bolǵan qarýly shabýylda el prezıdenti Nursultan Nazarbaev «shetelden nusqaý alǵan jalǵan dinı aǵym ókilderiniń terrorlyq shabýyly» dep ataǵan bolatyn. Aqtóbedegi oqıǵalarǵa baılanysty maýsymnyń 5-inen bastap Qazaqstan boıynsha 40 kún merzimge terrorlyq qaýip-qaterdiń sary deńgeıi jarıalanǵan.
