Almaty ákimdiginiń bastamasymen qalada aqyly avtoturaqtar qaıta jasaqtalýda. Elektrondy aqy tóleý qurylǵylary ornatyldy. Sóıtip, jol jıegine kólik qoıý úshin alynatyn tólemder burynǵy «qara naryqtan jaryqqa shyǵarylmaq». Búgin aqyly parkomat júıesi tolyq kúshine endi. Oǵan aqy tólemegenderge 3 aılyq-eseptik kórsetkish kóleminde aıyppul salynyp, tipti, kólikteri de evakýatorǵa "júk" bolýy múmkin.
Qala ákimi janyndaǵy Qoǵamdyq keńes maquldaǵan parkomat júıesi sheneýnikterge jaqqanymen qarapaıym turǵyndarǵa qolaıly ma degen suraq týady. Ázirge belgilengen turaqtarǵa kólik qoıǵandar ár saǵat úshin 100 teńge tóleýi kerek. Alda, kólik keptelisi jıi bolatyn oryndarda bul baǵam 300 teńgege kóteriledi degen de áńgime bar. Endi osy jerde buryn jol jıegine kólik qoıǵandardan aqsha jınaıtyn burynǵy «jasyl jelettiler» men búgingi parkomattardyń parqyna úńilsek.
Buryn kólik turaqtaryna júrgizýshiler ýaqyt uzaqtyǵyna qaramaı 50-100 teńge kóleminde aqy tóleıtin. Endi ár saǵat úshin 100 teńge tólenedi. Burynǵy 100 teńgeni kóp kórip, «jasyl jelettilermen» jaǵalasyp júrgen almatylyqtardy bul ózgeris qýanta qoımaıdy. Nege? Óıtkeni, kólikterin jol boıyna qaldyratyndardyń barlyǵynyń jumysy bir saǵat ishinde bitedi deı almaısyz. Bireý, bazar aralaýǵa
keledi, bireý shashtarazǵa barady. Bazar aralaýǵa kemi eki saǵat ýaqyt qajet bolsa, shashtarazda da sonsha ýaqyt otyryp qalýyńyz múmkin. Sonda buryn 50-100 teńge ǵana tólenetin turaqqa endi 400-500 teńge aqshańyzdy qıýǵa týra keledi. Kóligin jumys ornynyń aınalasyndaǵy turaqtarǵa jarty kúnge qaldyratyndar qaıtedi? Ádildik qaıda? Burynǵy «jasyl jelettiler» zańsyz aqsha jınap kelgen dedik. Al, myna «zańdy» aqsha jınaýshylardyń isin ne deýge bolady? «Zańdynyń» bári «qymbat» bolýy kerek pe? Aqyly avtoturaqtardyń avtomatty júıesin engizgende osy jáıtter nege eskerilmegen?
Qala ómirine enetin jańalyqtyń barlyǵyn qala turǵyndarynyń qaltasynan qarjylandyrýǵa ákimdik pen onyń aınalasyndaǵy kásiporyndar dándep alǵandaı. Jyl basynda qoldanysqa engen «Ońaı» elektrondy bılettendirý júıesi de kóptiń narazylyǵyna ushyrady. Tıimsizdigi úshin emes, taǵy da uıymdastyrýshylardyń shalaǵaılyǵy úshin. Ákimdik nasıhattaǵan júıeni qoldanysqa engizý úshin jolaýshylar óz qaltasynan 320 teńge berý kerek boldy. Júıe qoldanysqa engen alǵashqy aılarda-aq «Ońaı» kartalarynyń mıllıonǵa jýyq danasy satylǵanyn eskersek, halyqtyń qaltasynan qansha qarajat jınalǵanyn eseptep shyǵý qıyn emes...
Maýsym aıynyń sońyn ala ornatylyp, iske qosylyp jatqan myna parkomattar da ákimdiktiń «ońaı» oljaǵa, búdjetti tolyqtyrýdyń buqara halyqtan basqanyń qaltasyna salmaq salmaıtyn osyndaı «qarapaıym» ádisterinen basqany baıqamaıtynynyń bir belgisi. Tek, qala bıliginiń bul bastamalaryna quqyqtyq, zańdyq negizde narazylyq bildirip, eldiń múddesin qorǵaǵan avtokólik júrgizýshileriniń odaǵy, tutynýshylar quqyǵyn qorǵaý uıymdarynyń bolmaǵany qynjyltady. Al, ol «jańalyqtardy» engizýden túsetin qyrýar qarjyǵa kimder kenelip jatyr degen suraq óz aldyna bólek másele.
Jomart Abdollauly
