QR Aqparat jáne komýnıkasıa mınıstri Dáýren Abaev baılanys jáne aqparat qyzmetkerlerin kásibı merekemen quttyqtady, - dep habarlaıdy Qamshy.kz.

Mınstr óz quttyqtaýyn feısbýk paraqshasynda jarıalady. 

"Qymbatty áriptester, qadirli baılanys jáne aqparat salasynyń qyzmetkerleri! 
Mınıstrliktiń jáne ózimniń atymnan barshańyzdy kásibı merekelerińizben shyn júrekten quttyqtaımyn. 
Sizder - respýblıkalyq basylymdar men telearnalar qyzmetkerlerinen bastap, Qazaqstannyń árbir eldi mekenindegi baılanysshylar men poshtashylar el ıgiligin arttyrýǵa ólsheýsiz úles qosyp kelesizder.
Búginde biz jahandyq damý kóshinen qalmaı tórtkúl dúnıedegi oqıǵalardan der kezinde habardar bolyp otyrsaq, ol eń birinshi sizderdiń arqalaryńyzda júzege asýda. Dos-jarannan, týǵan-týystan, aǵaıynnan jyldam habar alǵyzyp, alysty jaqyndatyp otyrǵan da - sizder
Osynaý mereıli merekede Sizderge zor densaýlyq, shyǵarmashylyq tabys, kásibı jetistik, otbasylaryńyz ben jaqyn-jýyqtaryńyzǵa jaqsylyq tileımin!", - delingen quttyqtaýda. 
Búgin, 28 maýsymda Qazaqstanda buqaralyq aqparat quraldarynyń ókilderi kásibı merekesin atap ótip jatyr. Bul mereke bastapqyda Jýrnalısıka kúni dep atalyp, Qazaqstanda 10 mamyrda atap ótiletin. Sebebi qazaq tilindegi tuńǵysh "Túrkistan ýalaıaty gazeti" shyqqan ýaqyt osy edi.
Alaıda bul mereke 28 maýsymǵa aýystyryldy, sebebi BAQ týraly qazaqstandyq zań osy kúni qabyldandy. Merekeniń ataýy Baspa, radıo jáne televızıa dep atalyp, 2012 jylǵa deıin dástúrli túrde maýsymnyń sońǵy jeksenbisinde atap ótilip keldi. Keıin Qazaqstan Respýblıkasynyń Prezıdentiniń 2011 jyldyń 20 qazanyndaǵy jarlyǵy boıynsha onyń merzimi 28 maýsym bolyp ózgerip, merekeniń ataýy - Baılanys jáne aqparat qyzmetkerleri kúni degen ataý aldy.