Elimizdiń birinshi lıgasynda óner kórsetetin Shymkenttiń “Qyran” komandasyna golandıalyq qazaq fýtbolshy Murat Ónel qosylatyn boldy.
Murat Toqanuly Ónel 1987 jyly maýsym aıynyń 20 kúni Túrkıanyń Salıhly qalasynda týǵan. Otbasy 1990 jyldary Eýropaǵa qonys aýdaryp barǵan. Ata-anasy Amsterdam qalasynyń mańyna ornalasqandyqtan jas Murat sol jerde mektep bitirip, alty jasynan fýtbol oınaýmen aınalysqan. Boıy 179 sm, salmaǵy 76 keli tartatyn qandasymyz Eýropa fýtbolynda aty máshhur «Aıaks» mektebiniń túlegi. Jasyl alańda jartylaı qorǵaýshy, tipti komanda sapynda shabýylshy bolyp oınaıtyn Murattyń tehnıkasy joǵary bolyp, eki aıaqpen birdeı soqqy jasaı biledi. Aıtpaqshy, bul qazaq fýtbolyna shetten kelgen tuńǵysh qandasymyz.
2006-2007-jyldary Belgıanyń «Brúgge», 2007-2008-jyldary Golandıanyń «Den Haag», 2008-2012-jyldary Golandıanyń «Volendam», 2012-2013-jyldary Fınlándıanyń «Kaıanı» klýbynyń formasyn kıgen qandasymyz alǵash ret atamekenge aıaq basqaly tur. Osy jyldyń Naýryz aıynyń basynda Túrkıanyń Alanıa qalasynda ótken oqý-jattyǵý jıynynda bapkerler kóńilinen shyqqan Murat jańa maýsymda Shymkenttiń «Qyran» komandasynyń jeıdesin kımek. JAqynda ǵana Ońtústik Qazaqstan oblysyna tabany tıgen Murat Ónel óziniń Qazaqstan fýtbolyn nazardan tys shyǵarmaıtyndyǵyn aıtty.
«Men Golandıanyń premer-lıgasynda da oınaǵam. Ol jaqta básekelestik óte joǵary. Fýtbolshylardyń tehnıkalyq daıyndyǵy óte kúshti bolady. Sondaı-aq, kúsh-qýattary da mol keledi. Al, «Qyran» komandasyndaǵy oıynshylar jastar eken. Tehnıkalyq sheberlikteri de jaqsy. Alaıda, biz sharshap qalmaıtyndaı bolýymyz kerek. Kúsh qýatymyz myǵym bolǵany jaqsy. Jalpy, qazaq fýtbolyn únemi baqylap otyramyn. «Aqtóbe», «Shahter» «Ordabasy» syndy klýbtardy jaqsy bilemin»,- deıdi Murat «Alash aınasy» gazetinniń tilshisine bergen suhbatynda.
Shymkent áýejaıyna kelgen bette aýa-raıynyń salqyn ekendigin tilge tıek etken fýtbolshy, aldaǵy ýaqytta óńirdiń klımatyna úılesip ketetindigin aıtty. «Atamekenge birjolata kelýge oıyńyz barma?»,- degen tilshilerdiń suraǵyna «eki aptadan soń ata-anam elge keledi. Almatyda naǵashylarym turady. Árqashan shette júrsek te Qazaqstandaǵy týystarmen qarym-qatynasty úzgen emespiz»,- dep jaýap qaıtardy.
Jeke ómirine úńilgen BAQ ókilderiniń suraǵyna «Áli úılengen joqpyn. Degenmen, qazaq qyzyna úılengim keledi, biraq fýtbol da mańyzdy. Sondyqtan otbasylyq ómir men sportty qatar alyp júremin»,- dedi.
Murattyń atajurtqa oralýyna qazaq bloggerlery kóp úles qosysty. Ásirese, IT salasynyń mamany, tanymal bloger Arshat Orazov bul iske belsene kirisip, áleýmettik jeli arqyly Murattyń qazaq fýtbolyna degen qyzyǵýshylyǵyn oıatqan. Otandyq sport sheneýnikterine tanystyrǵan da sol bloggerler eken.
El birinshi lıgasynyń oıyndary 6 sáýirde bastalady. “Qyran” komandasy birinshi týrda “Astana-64″ komandasyn qabyldaıdy. Endeshe, jasyndaı jarqyraǵan qandasymyzdyń qazaq fýtbolyndaǵy alǵashqy oıynyn taǵatsyzdana kúteıik.
BAQ.kz
