Ony qylmysqa ne ıtermeledi? Kúlekbaevqa jaqyndary, ustazdary men kórshi-qolańy qandaı minezdeme beredi? «Habar» arnasynyń tilshileri osy suraqtarǵa jaýap izdepti. Bul týraly Qamshy.kz habarlaıdy.
Keshe Almatyda ylań salǵan 27 jastaǵy Rýslan Kúlikbaev Qyzylorda oblysy Baıqońyr qalasynyń týmasy. Juldyzdy qalashyqtaǵy №8 mektepte 9 jyl bilim alǵan. Burynǵy ustazdarynyń sózinshe, sabaq úlgerimi ortasha, tárbıesi de alańdaýshylyq týdyrmaǵan.
Gúlnár Qojaǵulova, Baıqońyr qalasy №8 orta mektebiniń oqý isi meńgerýshisi:
-Rýslan bizdiń mektepte 2006 jyly 9-synypty bitirdi. Odan keıin kásiptik ýchılıshege túsken bolatyn. Jalpy mektepte de tártibi aıtarlyqtaı jaman bolǵan joq. Ózin jaqsy jaǵynan kórsete bildi. Sabaq úlgerimi ortasha dep aıta alamyn. Rýslannyń osyndaı jaǵdaıǵa barýy, bul qalaı boldy degen suraq bizdi qatty tolǵandyrdy. Barlyǵymyz, muǵalimder mektep bolyp qınalyp kettik. Tipti ne oılarymyzdy da bilgen joqpyz.
Almaty oblysynyń Yntymaq aýylynda bolsa Kúlikbaevtyń qaıyn jurty turady. Biraq qylmysker áıeli men bala-shaǵasyn alyp ketken. Quqyq qorǵaý qyzmetkerleri onyń zaıybynan túsinik alý úshin Baıqońyrdan shaqyrtty. Qazir ol Almatyda. Yntymaqta 5-6 jyl turatyn kórshileri kúdikti osy ýaqyt aralyǵynda kelmegenin aıtady. Olar onyń júzin tek keshegi jaǵdaıdan keıin jańalyqtardan kórgen.
Nurmuhanbet Isataev, aýyl turǵyny:
-5-6 jyl boldy turǵanyma. Eshqashan kórgen joqpyn.
Quryqtalǵannyń áreketin psıholog mamandar taldaýǵa tyrysty. «Kópbalaly otbasynan shyqqan, ózi de eki balanyń ákesi bola tura bundaı qadamǵa barýy úlken psıhologıalyq aýytqýshylyqtyń belgisi», – deıdi maman.
Zarına Shteer, psıholog:
-Onyń dál osy sýrettegi bet-beınesin taldasaq, lıderlik qasıeti joq, aıtqandy isteıtin adam degen sıpat berer edim. Túrinen qobaljý, qınalý ne jasaǵan isine qaıǵyrý da baıqalmaıdy. Esirtki qoldanatyn adamǵa uqsamaıdy. Biraq kekshil, ashýshań adam sıaqty. Ondaılar psıhıkalyq aýytqýǵa beıim keledi.
Kúlikbaev buǵan deıin birneshe ret sotty bolǵany belgili. Sońǵy ret atys qarýyn zańsyz saqtaǵany úshin temir torǵa jabylǵan. Ótken jyly jazasyn ótep shyqqan.
Saltanat Muratova, oblystyq İİD Memlekettik til jáne aqparat bóliminiń jetekshi mamany:
-Ótken jyly, ıaǵnı 2015 jyly jazasyn ótep shyqty. Málimetterge súıensek, ol qazirgi tańda, ıaǵnı osy ýaqytqa deıin Almaty oblysynda turyp kelgen. Alaıda semásy, 2 balasy jáne áıeli Baıqońyr qalasynda turýda.
Ulttyq qaýipsizdik komıtetiniń derekteri boıynsha, Rýslan Kúlikbaev sońǵy kezde Almaty oblysy İle aýdany Yntymaq aýylynda turǵan. Uıaly telefon satýmen aınalysqan. 2010 jyly 27 tamyzda Shymkent qalasy Eńbekshi aýdandyq sotynyń úkimimen Qylmystyq Kodekstiń 178-baby 2-bóligi boıynsha sottalǵan. 2012 jyly 8 mamyrda Qyzylorda oblystyq soty QK-niń 251-baby boıynsha 2 jylǵa jáne 11 aıǵa bas bostandyǵynan aıyrǵan. Qazir isti UQK óz baqylaýyna aldy. Al İshki ister mınıstrligi málimetinshe, Rýslan Kúlikbaevqa qatysty Qylmystyq Kodeksiniń 8-baby boıynsha is qozǵalyp, sotqa deıingi tergeý amaldary bastaldy.
