Búgin Atyraý qalasynda jer komısıasynyń otyrysy ótýde. Onda komısıanyń ekonomıkalyq jumys tobynyń jetekshisi osyndaı usynys aıtty, - dep habarlaıdy Qamshy.kz.

Aqylbek Kúrishbaev komısıanyń jerdi jalǵa berý normasyn qaldyrý jónindegi ortaq kelisimge kelgenin, endigi ýaqytta jerdi jalǵa berýde aýyl turǵyndary men aýyl sharýashylyq bilimi barlarǵa basymdyq berilýi tıis degendi aıtady.

Jerdi memleketke qaıtarý, jalǵa berý erejesin zańmen bekitýge baılanysty jumys tobynyń jetekshisi naqty bes usynysty atap ótti.

«Birinshiden, qazir jerdi jalǵa berýdi ákimder ózderi sheshedi. Biz ol proses jalǵyz ákim quzyrynda qalmaı, quramyna halyq ókilderi kiretin komısıa quzyryna berilsin deımiz. Jerdi jalǵa berýdi, memleketke qaıtarýdy osy komısıa sheshýi kerek.

Ekinshiden, jalǵa beriletin jer ýchaskeleri týraly, aqparat jasyryn túrde ótedi deýge bolady. Málimetti ákimge jaqyn adamdar ǵana estıdi. Sol úshin jalǵa berý týraly aqparat aqparat quraldarynda 30 kún buryn jarıalanýy kerek.

Úshinshiden, búginde kelisim-shart jobasyn ákimder ózderi daıyndaıdy. Bul durys emes. Biz jerdi jalǵa berýdiń birińǵaı tıptik kelisim-shartyn jasaýdy usynamyz.

Tórtinshiden, jer sapasyn baqylaý, topayraq monıtorıń máselesine nazar aýdartamyz. Damyǵan elderde jer saıasatynyń temir qazyǵy – osy jer monıtorıńi. Bizde munda kóptegen kemshilikter bar. Sharýa qojalyqtarynyń jartysyna jýyǵynda áli kúnge jer pasporttary joq. Jer kadastryn anyqtaý ádistemesi 2003 jyly bekitilgen. Damyǵan elder tájirıbesinde jer baǵasy árbir úsh jyl saıyn ózgerip turady. Bizde de kóptegen suraqtar týyndaýda. Qunarsyz jerdiń salyǵy, qunarlyq jerlerdiń salyǵynan, jaıylym jerdiń salyǵy egistik jerdiń salyǵynan joǵary bolyp otyr. Osyndaı máselelerdi retteý úshin jerge ornalastyrý mekemesin aýylsharýashylyǵy mınıstrliginiń quramyna berý kerek. AQSH, Kanadada jerge baqylaýdy aýylsharýashylyq mamandary júzege asyrady.

Besinshiden, jerdi zańsyz bólý faktileri jıi kezdesedi. Bul halyq narazylyǵyn týdyrady. Ókinishke oraı, buǵan laýazymdy tulǵalar da jol berýde. Munyń bári zańnyń álsizdiginen týyndap otyr. Qazirgi zańnamaǵa sáıkes, jer qatynastaryna qatysty zań buzǵan sheneýnik 63 myń teńge aıyp tóleıdi. Biz ákimshilik kodeksti kúsheıtý kerek dep sanaımyz. Aqparattar ashyq bolýy kerek. Kimniń qansha jeri bar ekeninen aqparat beretin saıt ashý kerek.

Bul jumystar ekonomıkalyq jumys tobynyń eki aptada kelgen qorytyndylary», - deıdi A. Kúrishbaev.

Komısıa jumysyna Premer-mınıstrdiń orynbasary - Aýyl sharýashylyq mınıstri Asqar Myrzahmetov tóraǵalyq etip otyr. Atyraýǵa komısıanyń 25 múshesi barǵan.