Nóserlep quıǵan jańbyr Astananyń qaýyrt tirshiligin taǵy turalatyp tastady. Kesheli beri tolastamaǵan jaýyn bas qalany Venesıaǵa aınaldyryp jibergen. Júzdegen kólik belýardan sý keship, tipti kóbi sý ortasynda buzylyp ta jatyr, - dep habarlaıdy Qamshy.kz KTK arnasyna silteme jasap.
Sondyqtan polıseıler tutas kóshelerdegi qozǵalysty toqtatýǵa májbúr. Al komýnaldyq qyzmet qyzyl sýdy sorǵyzyp úlgere alar emes.
-Qazir Astanadaǵy Imanov kóshesinde «ýjas» fılm túsiremiz...
Astana týraly qorqynyshty fılm túsirgen júrgizýshiler búgin tizeden sý keshken teleoperatorlarmen jaǵalasyp júr. Sebebi Esildiń sol jaǵalaýynda ondaǵan kólik qaıyq sıaqty júzip ketti. Sý mashınanyń ishine deıin kirgen.
-Mine , salonǵa deıin kólkigen sý...
Kólikterin ıterip shyǵara almaǵan júrgizýshilerdiń ábden júıkesi juqarǵan. Buzylyp topan sýdyń ortasynda qalǵan mundaı temir tulparlardy qalanyń kez-kelgen aýdanynan kezdestiresiń. Jaǵdaıdyń ýshyqqany sonshalyq, polıseıler birneshe kóshedegi qozǵalysty toqtatýǵa májbúr boldy.
-«Jastar» aýdanymen júzip kelemiz...
Jańbyr sýy kóshelerdegi qozǵalysty ǵana emes, jer úılerdiń turǵyndaryn da esinen tandyrdy. Aınala kólshikke aınalyp, sý aýlalarǵa deıin kirgen. Bul aýdanǵa búdjettiń mıllondaǵan teńgesine taqtaıdaı tegis jol tóselgenimen, sheneýnikter aryq salýdy umytyp ketipti. Endi onyń zardabyn júzdegen otbasy tartyp otyr.
Dınara İrgebaeva, Astana qalasynyń turǵyny:
-Osy joldy jylyna 3-4 ret jóndeıdi. Bul bireýlerge tıimdi-aý deımin aqsha qymqyrýǵa...
Jeke sektor ǵana emes, memlekettik baǵdarlamamen salynǵan úılerdiń ishi de astan-esten. Tóbeden sý aǵyp, jańadan jóndeý jasalǵan páterlerdiń bárin búldirgen.
-Sylaqtary túsip, kirpishteri yrsıyp tur.
Osylaısha nóserden kóterilgen qyzyl sý, aǵatyn aryq tappaı Astanany naǵyz Venesıaǵa aınaldyryp jiberdi. Komýnaldyq qyzmet 24 saǵat jumys istegenimen aǵyn sýdy soryp úlgere almaı jatyr. Al Elorda ákimdigi jańbyrǵa barynsha tótep berip jatqandaryn aıtady. Biraq, káriz júıesiniń sý ótkizý deńgeıiniń tómendegi qıyndyq týǵyzady eken.
Qosman Aıtmuhanbetov, Astana qalasy ákiminiń orynbasary:
-Myna tazartý qurylǵysy Sol jaǵalaýǵa tolyq qyzmet ete alady. Qazir jyljymaly úlken sý sorǵyshtardyń kómegimen kóshedegi sýdy tazartyp jatyrmyz. Jyl sońyna deıin taǵy bir tazartý qondyrǵysyn iske qosý josparda bar.
Bir jaýyp, bir toqtap turǵan nóser aldaǵy eki kúnde áli de ábirgerge salmaq. Óıtkeni, senbi men jeksenbi de jańbyrly bolady deıdi sınoptıkter.
Jańbyr jaýsa synnyń astynda qalatyn Astana ákimdigi qazir aryq qazýǵa dereý kiristi. Sýaǵalardyń qurylysy ázirshe, Esildiń sol jaǵalaýynan bastalyp jatyr. Búdjettiń 10 mıllıard teńgesi jumsalatyn káriz júıesi aldymen «EKSPO» qalashyǵyna deıin tartylady. Kórmege keletin sheteldik qonaqtardy qaıyqpen júzip ketpesin dese, ákim Áset Isekeshovtyń komandasyna áli biraz ter tógýge týra keledi.
