QR Aýyl sharýashylyǵy mınıstrligi Orman sharýashylyǵy jáne janýarlar álemi komıteti Pavlodar oblysy Ertis ózeninde balyqtardyń jappaı qyrylý sebepteri týraly aıtyp berdi, - dep habarlaıdy Qamshy.kz QazAqpartqa silteme jasap.

«QR Aýyl sharýashylyǵy mınıstrligi Orman sharýashylyǵy jáne janýarlar álemi komıtetiniń Pavlodar oblysyndaǵy aýmaqtyq ınspeksıasy «Palodar oblysy tutynýshylar quqyǵyn qorǵaý basqarmasy» MB jáne «Pavlodar oblysy boıynsha ekologıa departamenti» MB zerthanalarynda radıologıalyq jáne toksıkologıalyq zertteýden ótken sý úlgilerinde aýyr metal tuzdarynyń kólemi qalypty deńgeıde ekeni anyqtaldy», - delingen komıtettiń «QazAqparat» agenttigine bergen resmı jaýabynda.

Vedomstvonyń habarlaýynsha, balyqtardyń qyrylý sebepterin anyqtaý maqsatynda «Qazaq balyq sharýashylyǵy ǵylymı-zertteý ınstıtýtynyń» Altaı fılıalynan arnaıy zertteýshiler shaqyrylǵan.

«Shyǵys Qazaqstan oblysyndaǵy sý qoımalarynan sý jiberilgennen keıin, balyqtardyń qyrylýy sý men aýanyń qatty ysýynan ózennen keletin sýy úzilip qalǵan jaıylma kólshikterde oryn alǵan. Monıtorıń nátıjesi boıynsha, 2016 jyldyń 12 jáne 18 shilde kúnderi balyqtyń qyrylýy tirkelgen joq, oqıǵany baqylaý jumystary jalǵasýda», - dep jazady komıtet.

Pavlodar oblysynyń quzyrly organdary Ertis ózeninen úzilip qalǵan kólshikterden shabaqtardy saqtaý qajettiligi týraly habardar etilgen.

Eske sala keteıik, bunyń aldynda BAQ ókilderi, Pavlodar oblysy Ertis ózeninde balyqtar jappaı qyrylyp jatqandyǵyn habarlaǵan bolatyn. Aımaqtyq tótenshe jaǵdaılar departamenti Mamyr aýdany men Aqsý qalasy mańynda oryn alǵandyǵyn atap ótken.