Mataev isi boıynsha tórt sheneýnik qylmystyq jaýapkershilikten bosatyldy, - dep habarlaıdy Qamshy.kz.

Qazaqstan Jýrnalıser Odaǵynyń tóraǵasy, Ulttyq baspasóz klýbynyń prezıdenti Seıitqazy Mataevpen birge tergeýge alynǵan tórt laýazymdy tulǵa QR QK-niń 65-baby negizinde, kinálaryn moıyndap, tergeý organdarymen áriptestik ornatqany úshin qylmystyq jaýapkershilikten bosatylǵan.

Olardyń esimderi de belgili. Olar – buryn Investısıalar jáne damý mınıstrligi quramynda bolǵan Baılanys, aqparat jáne aqparattandyrý komıtetiniń eks-tóraǵasy Talǵat Qazanǵap, Aqparattandyrý jáne baılanys komıtetiniń burynǵy basshysy Bolat Bersebaev, komıtet tóraǵasynyń orynbasary Bek Arpabaev, «Qazaqtelekom» AQ-y strategıalyq basqarý jónindegi bas dırektor Batyr Mahanbetájıev pen baılanys komıtetiniń basqarma bastyǵy Janbolat Baıbosynov.

Olardyń barlyǵy qarjy jymqyrdy, laýazymdy mindetterin asyra paıdalandy dep aıyptalǵan.

Al, burynyraq Baılanys, aqparat jáne aqparattandyrý komıteti tóraǵasynyń orynbasary bolǵan, QR Joǵarǵy soty aqparattyq qamtamasyz etý bóliminiń meńgerýshisi Bolat Kalánbekovtiń isi boıynsha tergeý jalǵasatyny habarlandy. S. Mataev advokattarynyń aıtýynsha, B. Kalánbekovke laýazymdyq mindetterin asyra paıdalandy degen aıyp taǵylýda.

Qazir sotqa S. Mataev pen onyń uly, «QazTAG» HAA bas dırektory Áset Mataevtyń isi berilgeni belgili boldy. olardyń isin Astana qalasynyń Esil aýdandyq №2 soty qaraıtyn bolady. Aldyn ala tyńdaý 3 tamyzǵa belgilengen.