Astana qalasy jolaýshylar kóligi basqarmasynyń basshysy Edil Súleımenov para alý ústinde ustaldy, - dep habarlaıdy Qamshy.kz Jemqorlyqqa qarsy is-qımyl Ulttyq búrosynyń baspasóz qyzmetine silteme jasap.

Edil Súleımenov 28 shilde kúni eki birdeı kásipkerden jalpy jıyny 2,1 mıllıon teńge para alyp jatqanda qolǵa túsken.

Ulttyq búronyń habarlaýynsha, ol aldymen deldaldar arqyly joldardaǵy jasandy kedergilerdi buzý jumystarynyń aktisine qol qoıǵany jáne kásipkerdi jaýapsyz oryndaýshylar reestrine qospaý úshin 1,5 mıllıon teńge para alǵan. Artynan aıaldama pavılondaryn jýyp, syrlaý jumystarynyń aktisine qol qoıý úshin 600 myń teńge parany taǵy alǵan.

Eki para alý oqıǵasynda para quny ótkizilgen memlekettik satyp alýlar baıqaýlary somasynyń 10 paıyzyn quraǵan.

E. Súleımenov qazir Astana qalasy İİD ýaqytsha ustaý ızolátoryna qamaldy. Sotqa deıingi tergeý bastaldy.