Aqtóbe oblysynda adam qaǵyp óltirgen aýyl ákimine qatysty sot bastaldy. Keńqıaq eldi mekeniniń basshysy bolǵan Nurlybek Qalmaǵanbetov jarty jyl buryn mashınasymen jol jıeginde turǵan kólikke soǵyp, janyndaǵy eki jigitti basyp ótken. Saldarynan 21 jastaǵy Ádilhan Qýanyshálın oqıǵa ornynda qaza tapty. Al qasyndaǵy jigit qazir jazylyp shyqty. Eń soraqysy, sheneýniktiń ol kezde kólik aıdaýǵa quqyǵy bolmaǵan. Onymen qoımaı, sol kúni mas eken, - dep habarlaıdy Qamshy.kz KTK arnasyna silteme jasap.
Jarty jyl buryn qyzmettik kóligimen jas jigittiń ómirin qıǵan ákimniń qylyǵy kópshiliktiń jaǵasyn ustatqan edi. Óıtkeni Keńqıaqtyń basshysy Nurlybek Qalmaǵanbetov jol jıeginde turǵan kólikti soǵyp, janyndaǵy eki jigitti basyp ótedi. Onymen qoımaı, qansyrap jatqan aýyldastaryn kóre tura oqıǵa ornynan qashyp ketken.
-Jol-kólik oqıǵasyn jasap, nátıjesinde aýyr saldarǵa ákep soqqanyn bile tura zardap shegýshilerge alǵashqy medısınalyq kómek kórsetpegen. Jol kólik oqıǵasy bolǵan jerden ketip qaldy, - deıdi Temir aýdany prokýrorynyń orynbasary Erkebulan Ermekbaev.
Munaıly aýylǵa ákim bolardyń aldynda Nurlybek Qalmaǵanbetov kólik aıdaý quqyǵynan aıyrylǵan. Ol kezde de mas bolyp ustalypty. Áıtse de, ákimshilik jaza oǵan sabaq bolmaǵan syńaıly. Óıtkeni apat bolar kúni de rúlge ishimdik iship otyrǵan.
-Masań kúıde boldy. İshkeni sezilip turdy. Iisi shyǵyp turdy.
Sheneýnik áli de «sol kúni saý edim» dep otyr. Al apattyń keshqurym abaısyzda bolǵanyn aıtyp ant-sý ishýde.
- Birinshi basqan joqpyn dep oıladym. Qaıtqan balany kórgende joqpyn. Sodan men de shokta ketip qaldym. Men qashqan joqpyn, aıyptalýshy Nurlybek Qalmaǵanbetov.
Ákim qaǵyp óltirgen Ádilhan Qýanyshálınniń ata-anasy keshirim berýden bas tartqan. Olar jol boıynda qansyrap jatqan balasyn tastap ketken Qalmaǵanbetovten túńilip otyr.
Jábirlenýshi tarap ákimnen ózge Keńqıaqtaǵy ambýlatorıa dárigeriniń de jazalanýyn talap etip otyr. Óıtkeni jol-kólik oqıǵasy bolǵan kúni sheneýnik ishimdik ishpedi dep anyqtama beripti. Al onysy keıin ótirik bolyp shyqty.
Ótirik ekeni saraptama arqyly dáleldendi. Al sotqa shaqyrylǵan kýágerlerdiń jartysynan kóbi aýyl ákimderi men memlekettik qyzmetkerler eken. Aralarynda kásipkerler de bar. Óıtkeni Qalmaǵanbetov apat bolatyn kúni keshqurym solarmen kezdesken kórinedi. Biraq olar sheneýnikpen dastarhandas bolǵanyn joqqa shyǵaryp otyr.
