Olımpıadanyń ashylý saltanaty Brazılıa baıraǵynyń kókke kóterilip, Ánuranynyń shyrqalýymen bastaldy. Budan keıin, BUU Bas xatshysy Pan Gı Mýn Oıyndarǵa qatysqaly kelgen sportshylarǵa sáttilik tilep, álem xalyqtaryn Olımpıada kezinde beıbitshilikti saqtaýǵa úndedi, - dep habarlaıdy Qamshy.kz QazAqparatqa silteme jasap.
Ary qaraı basty shoý teatrlandyrylǵan qoıylymmen jalǵasty. Onyń sújeti boıynsha aldymen Jerdegi ómirdiń paıda bolýy, Brazılıa jerindegi túpki xalyqtardyń týýy, tuńǵysh ret olardyń ómirge qamdanýy, ulttyq dástúrlerdiń qalyptasýy sýretteledi. Qazirgi ýaqytta Brazılıa túpki xalqynyń sany 900 myńnan ǵana asady. Olar júzden astam etnıkalyq topqa bólingen. Taram-taram bolǵan olar búginde úsh júzge taıaý tilde sóıleıdi. Keıin Ońtústik Amerıkaǵa portýgalıalyq kelimsekterdiń kele bastaýy, alǵash ret jergilikti xalyqtarmen kezdesýi baıan etiledi. Odan soń, bul jerge portýgalıalyqtardyń qara eńbekke tartqan afrıkalyq quldardyń aǵylýy, tórt júz jylǵa sozylǵan qulıelenýshilik dáýir, jer sharýashylyǵynyń damýy jaıynda ınstalásıalar kórsetiledi.
Sonymen qatar, taǵy bir kósh - soltústik afrıkalyq arab xalyqtarynyń Brazıalıaǵa kóptep kele bastaýy, 20-shy ǵasyrdyń basynda japon ımıgranttarynyń kóshi de tarıx betterine máńgi jazylǵan. Osynyń barlyǵy Ońtústik Amerıka qurlyǵynda etnıkalyq sanalýandylyqqa alyp keldi.
Teatrlandyrylǵan qoıylym Brazılıadaǵy estrada juldyzdary men bıshilerdiń ónerine ulasty.
Budan keıin dástúr boıynsha, Olımpıada ashylýynda álem sportshylarynyń sherýi ótti. Oǵan 207 eldiń 12 myńǵa tarta delegasıasy qatysty. Sportshylar sherýi Brazılıanyń dástúrli karnavalyna jalǵasyp ketti.
Osydan soń, sharanyń resmı bóliginde Brazılıanyń olımpıada komıtetiniń tóraǵasy Karlos Nýzman men Halyqaralyq olımpıada komıtetiniń basshysy Tomas Bax barsha álemge úndeýlerin arnady.
Sonymen qatar, HOK Olımpıada tarıxynda alǵash ret taǵaıyndalyp otyrǵan Olımpıadalyq qozǵalysty damytqany úshin beriletin arnaıy syılyqty eki dúrkin Olımpıada chempıony, kenıalyq dańqty sportshy Kıpchogý Kıp Keınýge tabys etti. Aıta keteıik, bul syılyq endi budan bylaı barlyq Olımpıada Oıyndarynda dástúrli túrde tabystalatyn bolady.
Kóp uzamaı, Halyqaralyq Olımpıada komıtetiniń resmı baıraǵy kókke kóterildi.
Saltanatty sharany ataqty brazılıalyq ánshi jáne kompozıtor Kaetaný Velozý ary qaraı ilip áketti. Sonymen qatar, «Gremmı» syılyǵynyń birneshe dúrkin ıegerimen birge 2003-2008 jyldary Brazılıanyń mádenıet mınıstri bolǵan mýzykant Jılbertý Jıl men ánshi Anıtta bir sahnaǵa shyǵyp án shyrqady. Olardyń ánine brazılıalyq samba bıiniń tanymal 12 mektebiniń ónerpazdary karnaval sherýine bılep shyqty. Bıge jaqyn brazılıalyq xalyq samba bıimen saltanattyń kórigin qyzdyrdy.
Sońynda «Marakana» stadıonyna Olımpıa alaý jetizildi. 123 kún boıy 65 000 shaqyrymdy júrip ótken Olımpıada alaýyn brazılıalyq marafonshy, 2004 jylǵy Afına Olımpıadansyń qola júldegeri Vanderleı Kordeırý jaqty. Osylaısha, estafetasy 123 kúnge jalǵasqan Olımp alaýynyń qazandyǵynda tutandy.
Olımpıa alaýy - Olımpıadanyń birden-bir sımvoly. Ol jarystyń ashylý saltanatynda qazandyqta tutanyp, jarys bitkenge deıin jaǵylyp turady.
Alaýdy tutatý rásimi ejelgi Grekıada ótken Olımpıa oıyndarynan bastaý alady. Sol kezde adamdar Prometeı tıtanynyń erligine qurmet retinde alaýdy tutatý saltanatyn ótkize bastaǵan. Ańyz boıynsha Prometeı Zevsten alaýdy urlap, adamdarǵa syıǵa tartqan-mys.
Antıkalyq alaý sodan 1928 jylǵa deıin tutanǵan joq. Ol tek 1936 jyly qaıta qolǵa alyna bastady. Sol kezdegi alaý estafetasy fashısik Germanıa jetekshileriniń biri Iozef Gebbelstiń usynysy boıynsha ótkizildi. Oǵan estafeta kezinde 3 000-nan astam jelaıaq qatysqan. Alaýdy tutatý rásimi 1936, 1948 jyldary Qysqy Olımpıa oıyndarynda da bolǵan. Biraq, estafetany laıyqty deńgeıde ótkizý 1952 jyly Osloda ótken Olımpıada qarsańynda múmkin boldy. Onyń ózinde alaýdy ustap júrý Olımpıadan emes, Morgendalede bastaý aldy. Al qazir alaýdy tutatý rásimi Olımpıada jarystan birneshe aı buryn bastalyp júr.
Brazılıanyń Rıo-de-Janeıro qalasynda ótetin jazǵy Oıyndarǵa álemniń túkpir-túkpirinen, naqtyraq aıtqanda, 207 elden 10,5 myń sportshy qatysady. Olar sporttyń 33 túri boıynsha baq synasady. Rıo Olımpıadasynda barlyǵy 306 medal jıyntyǵy sarapqa salynbaq.
Olımpıadaǵa eń kóp sportshy aparatyn el - AQSH bolmaq. Rıo Oıyndary joldamasyn jeńip alǵan amerıkalyq sportshylar sany - 555. Olımpıadaǵa qatysatyn sportshylarynyń sany jóninen ekinshi orynda Brazılıa tur. Oıyndar qojaıyny 462 joldamaǵa qol jetkizipti. Rıoǵa Germanıadan - 425, Qytaıdan 416 sportshy attanady. Osylardyń arasynda, mysaly, Qytaı quramasy sapynda 35 Olımpıada chempıony bar. Al eń az delegasıa Chad jáne Tývalý Respýblıkasyna tıesili. Alǵashqysynyń quramasynda tek úsh sportshy bolsa, sońǵysynda 1 ǵana sportshy.
Qazaqstan Rıo Olımpıadasyna sporttyń 26 túri boıynsha 104 sportshyny attandyrdy. Sportshylarymyzdyń tórteýi London Olımpıadasynyń júldegerleri: Olga Rypakova (altyn), Ádilbek Nıazymbetov (kúmis), Ivan Dychko (qola) jáne Gýzel Manúrova (qola).
