Almatylyq turǵyn ulynyń týý týraly kýáliginde jazylǵan álemde joq ult ataýynan qutyla almaı júr. 2005 jyly Almatynyń Jetisý aýdandyq azamattardyń hal-aktilerin tirkeý mekemesi qujatqa ulty degen tusqa "KNR" dep jazyp jibergen. Óreskel qatelikke namystanǵan turǵyn 3 aı buryn kýálikti qaıta aýystyrmaq bolady. Alaıda mekeme qyzmetkerleri jer betinde joq ulttyń ataýyn "qazaq" dep ózgertýdi tym qıyndatyp jibergen eken, - dep habarlaıdy Qamshy.kz 31 arnaǵa silteme jasap.
11 jasar ulym Nursultan "ultym kim" dese, jaýap berýge qınalamyn degen azamat týý týraly kýáliktegi ultymdy aýystyra almaı úsh aı júgirdim deıdi. 2002 jyly Qytaıdan kóship kelgen turǵyn 2005 jyly dúnıege kelgen ulyna qujat alady. Alaıda AHAT qyzmetkerleri týǵan jylyn qate jazyp jibergen. Jýyrda kýálikti qaıta rásimdegende ulty "KNR" kúıinde qalǵan. Namystanǵan azamat mekeme qyzmetkerleriniń saýatsyzdyǵyna renjıdi.
- Saýatsyzdyǵy kúshti bolyp tur. Jer betinde joq ultty moınymyzǵa tańyp berdi. Joq ulttan "qazaq" bolý úshin osynshama qujat jıyp júrdim. Bul endi uıat, elimizge uıat. "KNR" degen ult jer betinde bar ma, osyny Jetisý aýdandyq ZAGS dáleldep berse eken dep talap etemin, - deıdi Almaty turǵyny N.Rahmetolla.
Qyzmetime zıany tıedi dep beınesin kórsetpeýdi suraǵan turǵynmen birge AHAT mekemesine túsirý toby da kirdi. Tilshilerdi kútpegen qyzmetkerler alǵashynda eshqandaı pikir bildirmeı, túsinik berýge qarsy bolǵan. Alaıda aýdandyq ákimdik ókilderi aralasyp, jaǵdaıdy túsindirýge tyrysty. AHAT meńgerýshisi kýálikte ketken qatelik 2005 jyly jumys istegen qyzmetkerlerdiń kinási deıdi
.
- Endi "ulty" degen jerde "Qytaı halyq respýblıkasy" dep jazylyp ketken. Qate bolǵan. Ony jóndeýge bolady. Zańdy joldary bar. Jóndeý úshin tıisti qujattardy jınaý kerek. Ol kisige aıtylǵan, keńes berilgen. Qandaı tizimdi jınaýdy aıttyq. Sony jınap berip, sol kisi aryz jazý kerek edi, - Jetisý aýdandyq AHAT bóliminiń meńgerýshisi Gaýhar Erǵoja.
Nege bireýdiń qatesi úshin basqa adam sandalýy kerek demesten, kýáliktegi álemde joq ult ataýynan arylǵysy kelgen azamat úsh aı júrip tıisti qujattardy jınapty. Óziniń qazaq ekenin dáleldeý úshin talaı esikti qaqqan ol AHAT bólimine aryz da jazdy. Úlken aıqaı-shý men 31 arnanyń aralasýynan ulty "qazaq" degen kýálik bir saǵatqa jetpeı daıyn boldy. Bul barshaǵa sabaq bolarlyq jaǵdaı.
