Túrmede jazasyn ótep jatqan «QazAtomÓnerkásip» AQ burynǵy basshysy Muhtar Jákishev mekemede 5 yntalandyrý alǵan jáne bir márte jazaǵa tartylǵan, - dep habarlaıdy Qamshy.kz QazAqparatqa silteme jasap.

Bul týraly Almaty oblysy boıynsha qylmystyq-atqarý júıesi departamenti dırektorynyń orynbasary, ádilet podpolkovnıgi Qýat Qılybaev málimdegen.

«Jazasyn óteý kezinde 5 yntalandyrý aldy jáne bir ret jazaǵa tartyldy», - delingen resmı jaýapta. Degenmen hatta bul jaza ne úshin bolǵany, M.Jákishev ony qalaı ótegeni aıtylmady.

Hatta atap kórsetilgenindeı, Muhtar Jákishev, 1963 jyly týǵan, QR QK-niń 176 babynyń 3 tarmaǵy, «a», «b», «g» tarmaqshasy, 193 babynyń 3 tarmaǵy, «a», «b» tarmaqshasy, 307 babynyń 4 tarmaǵy, 235 babynyń 1 tarmaǵy, 58 baby 3, 6 tarmaǵy boıynsha 14 jylǵa bas bostandyǵynan aıyrylǵan. Almaty oblysy boıynsha qylmystyq-atqarý júıesi departamentiniń LA 155/8 mekemesine 2015 jyldyń 25 sáýirinde jetkizildi. Sonymen qatar 2013 jyldyń 31 jeltoqsanynda QR Qylmystyq-atqarý kodeksiniń 116 babyna sáıkes, mekeme komısıasy ony jazany óteýdiń jeńildetilgen jaǵdaılaryna kóshirýdi sheshken. 

«Mekemege jetkizilgennen keıin jumysqa ornalastyryldy. Erikti túrde talap-aryzdy óteýde. Eńbekke degen qarym-qatynasy oń. Mekeme aýmaǵyn abattandyrýǵa, otrádtyń mádenı-turmystyq jaǵdaıyn jaqsartý isine tıanaqty qaraıdy. Tárbıelik, mádenı-buqaralyq jáne sporttyq sharalarǵa, sonymen qatar otrádtyń qoǵamdyq ómirine belsendi túrde qatysady», - dep habarlady «QazAqparat» agenttigine.

 Sondaı-aq, «Shartty túrde merziminen buryn bosatý týraly qoldaýhat mekeme ákimshiligine túspegendikten, atalmysh suraq sotta qaralǵan joq», - dep habarlaıdy departament ókili.