Sh. Aımanov atyndaǵy «Qazaqfılm» AQ, kınoprodúser jáne ınvestor Álıdar Ótemuratov Gollıvýdtyń tanymal prodúserleri – Kerı Granat (Cary Granat) jáne Oskar júldesiniń ıegeri Ed Djonspen birlese otyryp «Ámire» atty (jumys ataýy) kınojobany túsirýdi qolǵa aldy, - dep habarlaıdy Qamshy.kz.
1925 jyly Parıj aspanyn ánge bólep, kúlli álemdi tamsandyrǵan Ámire Qashaýbaevtyń ómir jolyna arnalǵan jańa kórkem fılmdi túsirýdi qolǵa alǵany týraly «Qazaqfılm» AQ baspasóz qyzmeti aqparat taratty.
2017 jyly halyqaralyq prokatqa shyǵarýǵa josparlanǵan «Ámire» kınojobasy koprodýksıa negizinde, ıaǵnı Qazaqstan men AQSH-tyń birlese otyryp shyǵaratyn alǵashqy jobasy bolmaq.
Kınotýyndy qazaqtyń tuńǵysh dramalyq tenor daýysty birtýar ánshisi Ámire Qashaýbaevtyń (1888-1934 jj.) qamshynyń sabyndaı ǵana qysqa da, jarqyn ǵumyryn baıandaıdy. 1925 jyly Parıjde ótken Exposition Internationale des Arts Décoratifs et Industriels Modernes sheńberinde ótken búkilálemdik mýzykalyq baıqaýda Eýropa kórermenderine qazaqtyń dástúrli ánshilik óneri men qara dombyrasyn pash etken 36 jastaǵy Ámre Qashaýbaev KSRO delegasıasynyń arasynan top jaryp, ekinshi oryndy jáne kúmis medal ıelendi. Fılm, sondaı-aq, daryndy ánshiniń Mustafa Shoqaımen kezdesýi, jaz oryndaýshysy Djordj Gershvınmen tanysýy jáne týǵan jerine oralǵanda basty keıipkerdiń bastan keshken synaqtary týraly syr shertedi.
Fılmde Ámire Qashaýbaevtyń repertýaryndaǵy «Balqadısha», «Surjekeı», «Úsh dos», «Dýdaraı», «Jalǵyz arsha», «Bes qarager», «Aǵash aıaq» jáne «Áı-áı bópem» ánderi oryndalady. Shilde aıynyń sońynda Latvıanyń Rıga qalasynda bastalǵan túsirý jumystary qyrkúıek aıynda Almaty qalasynda jalǵasady.
Halyqaralyq túsirilim tobynyń quramynda: amerıkalyq qoıýshy-rejısser Djef Vespa (Jeff Vespa), operator – Maksım Osadchıı («9 rota», «Stalıngrad») bar. Fılmniń senarıin jazǵan Benjamın A. van der Vın (Benjamin A. van der Veen). Basty rólderdi otandyq akterler Sanjar Mádıev (Ámire) jáne Máskeý kınofestıvalinde «Úzdik er adam róli» nomınasıasynda jeńiske jetken Erkebulan Daıyrov (Mustafa Shoqaı) somdaıdy. Sonymen qatar brıtandyq akter Ben Aldrıdj (Ben Aldridge) jáne «Oblasttmy» fılmi arqyly tanylǵan amerıkalyq aktrısa Ebbı Kornısh (Abbie Cornish) syndy basqa da akterler qatysady.
Fılmniń atqarýshy prodúserleri – Áset Kenjebaev jáne Anna Chakırtova. Tarıhı keńesshi – Ámire Qashaýbaev týraly birneshe eńbekterdiń avtory Qazaqstan Respýblıkasynyń eńbek sińirgen qaıratkeri Jarqyn Shákárimov. Mýzykalyq prodúseri – «The Magic of Nomads» jobasynyń avtory ári jetekshisi Ǵazıza Ǵabdrahımova. Qoıýshy sýretshi – Ekaterına Zaletaeva, kostúm boıynsha sýretshiler – Ásel Shalabaeva jáne Daıva Petrýlıte.
