Qamshy.kz redaksıasyna Almaty oblysy Eńbekshiqazaq aýdany Shelek aýylynyń 38 turǵyny qol qoıyp, Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyulynyń atyna joldanǵan hat kelip tústi.
Hatqa qol qoıǵandar Shelek eldi-mekenindegi «Nur-Muhammed» meshitiniń Bas ımamy bolyp Rasýl Shahınovtyń taǵaıyndalǵanyna narazylyq bildirgen.
«Nur-Muhammed» meshiti ashylǵan 2011 jyldan beri onda Jumabaı Súıinbaıuly degen azamat ımam bolyp keldi. Ol dinı bilimi joǵary, Hanafıt mazhabynyń erejelerin qatań ustanatyn. J. Súıinbaıulynyń ımamdyq etken ýaqytynda meshit jamaǵatynyń sany da udaıy artyp otyrdy. Meshit ishi halyqqa lyq tolatyn boldy.
Bıyl Ramazan aıynyń qarsańynda aıaq astynan Jumabaı ımam ornynan alynyp, ımamdyqqa Rasýl Shahınov degen azamat taǵaıyndaldy. Meshit jamaǵatynyń narazylyq bildirýiniń basty sebebi ol keýdeden tákpir alady, namazdan soń quran oqymaıdy, bet sıpamaıdy, jalǵyz namaz oqysa taltaıyp turyp oqıdy.
Qazaq tilin jetik bilmegendikten (R. Shahınov – uıǵyr dıasporasynyń ókili) ýaǵyzdary da jurtqa túsiniksiz bolyp otyr. Ol ımam bolyp taǵaıyndalǵaly beri meshitte salafıtter qaptap ketti. Olar súnnet namazdaryn múldem oqymaıdy. Tipti, aralarynda Ózbekstannan kelgender de bar», - delingen atalǵan hatta.
Sondaı-aq, hat avtorlary R. Shahınovtyń ımam bolyp taǵaıyndalý sebepterin bilmekke osy salaǵa jaýapty mekeme, uıymdarǵa habarlasqandaryn da aıtady. Olardyń oıynsha, R. Shahınov aýdandaǵy ókil ımam, aýdandyq ishki saıasat bóliminiń bastyǵy qoldaǵannan keıin taǵaıyndalyp otyr.
Shelek meshitiniń jamaǵaty Bas múftıden atalǵan máselege aralasyp, oń sheshim shyǵarýdy ótinip otyr.
«Biz, meshit jamaǵaty, eldiń erteńine alańdaýlymyz. Keleshek urpaqqa ata-babamyz ustanǵan Hanafı mazhabynda tárbıe berý úshin, elimizdiń birligi, dinimizdiń tutastyǵy úshin R. Shahınovty ornynan bosatyp, burynǵy ımamymyzdy qaıtarýdy nemese dinı baǵyty durys basqa ımam jiberýińizdi suraımyz. Sondaı-aq, dinı saýaty mansabyna saı kelmeıtin aýdandyq ókil ımamdy da ornynan bosatýyńyzdy suraımyz», - delingen hatta.
