Aýyr atletıkadan qyzdar arasynda el namysyn qorǵaǵan Karına Gorıcheva qossaıystyń qorytyndysy boıynsha 243 (111+132) kelini kóterip, Rıo Olımpıadasynyń qola júldegeri atandy, - dep habarlaıdy Qamshy.kz QazAqparatqa silteme jasap.
Serpe kóterýde qytaılyq atlet 147 kelini enserdi. Qos saıystyń qorytyndysy boıynsha 262 kelimen Deng Veı álemdik rekordty jańartty (115+147). Ekinshi oryn Soltústik Koreıa ókili Chý He Sımge buıyrdy 248 (105+143). Al Gorıcheva serpe kóterý jattyǵýyn 132 kelimen aıaqtap, qola júldeger atandy.
Serpe kóterýde jerlesimiz birinshi múmkindiginde 132 kelini baǵyndyrsa, ekinshi jáne úshinshi múmkindiginde 137 kelini kótere almady.
Al osyǵan deıin alǵashqy jattyǵýda ol birinshi múmkindiginde 107 kelini baǵyndyra almady. Al ekinshi múmkindiginde týra osy salmaqty qınalmaı baǵyndyrdy. Úshinshi múmkindiginde 111 keli ziltemirdi basynan asyra kóterdi.
Mine, osylaısha búgin Qazaqstan qorjynyna úshinshi qola medal tústi.
Esterińizge sala keteıik, Karına Gorıcheva aýyr atletıkamen 15 jasynan beri aınalysyp keledi. Ol erekshe daryndy balalarǵa arnalǵan respýblıkalyq mektep-ınternatynyń túlegi.
Karına jasóspirimder arasyndaǵy Álem chempıonatynyń kúmis, qola júldegeri jáne jasóspirimder arasyndaǵy Azıa chempıonatynyń qol júldegeri.
Qazaqstan Respýblıkasynyń halyqaralyq dárejedegi sport sheberi.
Esterińizge sala keteıik, Olımpıadanyń birinshi kúni dzúdoshy Eldos Smetov kúmis, Galbadrah Otgonseseg qola medal enshilese, keshe aýyr atlet Farhad Harkı úshinshi medaldi el qorjynyna saldy. Sondaı-aq, aıta keteıik, jarystyń birinshi kúni Margarıta Elıseeva besinshi orynǵa, ekinshi kúni Arlı Chonteı tórtinshi orynǵa taban tiregen bolatyn.
