Jer komısıasynyń Astanada ótip jatqan búgingi otyrysynda komısıa múshesi Dáýren Babamuratov aýyl sharýashylyǵy jerlerin sheteldikterge jalǵa berý men el azamattaryna jeke menshikke satýǵa qoıylǵan moratorııdi taǵy bes jylǵa uzartý týraly usynysty qoldady, - dep habarlaıdy Qamshy.kz.

«Qalyptasqan jaǵdaıda eń utymdy sheshim osy bolsa kerek. Sondyqtan bul – halyqtyń jeńisi, eldiń jeńisi. Buryn kóterilip júrgen basty máseleler osy edi. Úsh aıdyń ishinde biz eki taraptyń da kózqarasyn tyńdadyq», - dep atap ótti Dáýren Babamuratov.

Onyń pikirinshe, ortaq sheshim qabyldaý úshin ýaqyt kerek ekeni sózsiz.

«Sondyqtan men moratorııdi qoldaımyn. Al endi, bir aıdyń ishinde komısıa quramy ondaǵan, odan da kóp táp-táýir usynys aıtty. Ol usynystardyń taǵdyry ne bolady? Osy usynystardyń utymdy bolýyn, durys júıege asýyn, ary qaraı durys óńdelýin, jóndelýin kim qadaǵalaıdy, kim baqylaıdy? Bizdiń osyndaı minberden taǵy sóıleýge múmkindigimiz bola ma? Osy suraqtar men úshin óte mańyzdy. Endi, maratorıı jarıalaǵannan keıin komısıa jumysy toqtaıtyny aıdan anyq. Ol durys ta shyǵar. Biraq ta komısıanyń sheshimderin baqylaıtyn, iske asyratyn, qarap otyratyn qosymsha bir organ nemese taǵy bir komısıa qurylýy qajet ekeni sózsiz. Men maratorııdi qoldaımyn», - dep túıindedi komısıa múshesi.

Esterińizge sala keteıik, Jer reformasy jónindegi komısıanyń búgingi otyrysynda QR Premer-mınıstriniń orynbasary, aýyl sharýashylyǵy mınıstri, komısıa tóraǵasy Asqar Myrzahmetov Jer kodeksiniń keıbir baptaryna engizilgen moratorııdi bes jylǵa, ıaǵnı, 2021 jyldyń 31 jeltoqsanyna deıin uzartýdy usynǵan bolatyn.