Ákem aǵasynyń maıdan dalasynan jazǵan hattaryn «kózińniń qarashyǵyndaı saqta» dep maǵan amanattap ketti. Kádimgi úshburyshty «dala poshtasynan» jazylǵan hattar. Kózimdi sýlap otyryp oqıtyn hattarynan onyń elge degen qımas saǵynyshyn sezemin. Kómeski tartyp jazýlary óshe bastaǵan hattaryn ejikteı otyryp, núktesine deıin jattap aldym dese de bolady, myna bir hatynda «Baýyrym,- dep bastaǵan eken, - biz keńes odaǵynyń ár pushpaq jeri úshin qıan - keski soǵyspen sheginýdemiz. Eger jerden aırylsaq, eldigimizden aırylatynymyzdy, eldigimizden aırylsaq halqymyzdan aırylatynymyzdy bilemiz. Sol úshin jerimizdiń ár súıemin qasyq qanymyz qalǵansha qorǵaýdamyz.
Qazir shabýylǵa shyǵamyz, İnim aman-esen kezdesýge jazsyn,- dep hatyn kelte aıaqtapty. Osy hattan soń aǵamnan habar úzilse kerek. Ákem habar-osharsyz ketken aǵasyn ómiriniń sońyna deıin izdeýmen ótti. Ony ınternettiń «memorıal» saıty arqyly aǵamnyń Belarýsıa jerinde jerlengenin bildim. Aǵam súıem jerdi jastanyp jaýǵa bermeı jan tapsyrypty!!!
Keńes halqy ár súıem jer úshin qanyn tókse, bizdiń úkimet 1mln.700 myń ga «bos jerdi» satýǵa shyǵarǵanyn, onyń syrtynda taǵy da 100 mln. ga. bos jatqan jer bar kórinedi. «Bos jer» dep aıtýǵa qalaı aýyzdary barǵany, eger onyń egesi qazaq halqy bolsa. Ózim Babalarymnan qalǵan jerdiń satylýyna da, jalǵa berilýine de qarsymyn…
Keshegi Daraboz Qabanbaı, Qanjyǵaly Bógenbaı, Shaqshaquly Jánibek batyrlar qan keship júrip, ultaraqtaı jerdi ulǵaıtyp onyń asty- ústin baılyqqa toltyryp urpaqtaryna tastap ketse de, qazaqty el qylatyn esti han buıyrmapty. Ábilhaıyr han qaraqan basy úshin qazaq jerin Reseıge qosyp, qazaqtyń oı-armanyn 300 jylǵa shegerip tastaǵan…
Nemere aǵamnyń zıraty Belarýsıa jerinde bolǵan soń alańsyzbyn, óıtkeni Belarýssıada jer satylmaıdy, Belarýsıada bizdegideı «bos jer» joq, jer ıesi Belarýstar. Olardyń Lýkashenko degen kóregen basshysy jer satylsa bıliginen de, elinen de aırylatynyn bilip, kolhoz, sovhozdardy taratpaı belarýs sharýalarynyń qolyna berip qoıǵan. Al bizde táýelsizdik alǵannan keıin jer egesi kolhoz-sovhozdar taratylyp jiberildi!!!
Jańa ǵana oqyp-bilip otyrmyn Astananyń irgesinen 27 myń ga jerdi Germanıa azamaty Robert Shýmaher satyp alyp, transheıa qazyp shekara ornatyp qoıǵanyn. Al, qytaılyqtar 1mln 700 myń ga jerdi satyp alsa, ol jerden múldem aırylamyz ǵoı!!!
Allanyń nury daryǵan Elbasy: «Halyq qoldamaıtyn zańnyń keregi joq. Halyqpen aqyldasyńdar... Halyqtyń Jerdi satýǵa qarsy shyǵyp, kóshege shyqqanyna bir jaǵynan rıza bolyp otyrmyn...» degen pármenine rıza boldym, sondyqtan jer satylmasyn, jalǵa da berilmesin, jer egesi qazaq halqy.
Ersin Erǵalıev
