Búgingi kúni Ońtústik Qazaqstan oblysynyń kóleminde 1200 shaǵyn, orta jáne iri ara ósirýshi jeke jáne zańdy tulǵalar bolsa, olar jylyna kóleminde 100 tonna bal óndiredi, dep habarlaıdy Qamshy.kz Baq.kz - ke silteme jasap.
Búginde oblysta bal ara sharýashylyǵyn damytý maqsatynda birqatar jumystar atqarylyp, ony seleksıalyq asyldandyrý jumystaryn júrgizgeni úshin árbir uıashyǵyna memleket tarapynan 3190 teńge qoldaý qarjy tólenýde. Al 2016 jyly 3 myń uıashyqqa 9570,0 myń teńge qarjy bólý josparlanǵan.
Ońtústiktiń omartashylaryna qoldaý kórsetip otyrǵan mekemeniń biri «Yrys» mıkroqarjy uıymy. Atalmysh uıymnan qoldaý alǵan sharýashylyqtyń biri «EkoMód» JSHS. Seriktestik ara sharýashylyǵyn damytý úshin qarjy uıymynan tómendetilgen jyldyq mólsherleme negizinde 5 mln. teńge nesıe alyp, oǵan 480 dana ara uıashyǵyn satyp alǵan. Olar ár uıashyqtan shamamen 25-30 kg., ásel ónimin alady. Bıyl sharýashylyqqa Avstrıa men Ýkraına elderinen asyl tuqymdy karpattyq bal aralary ákelindi. Aranyń bul túrleri baldy jaqsy jınaıdy ári aýa-raıyna jyldam beıimdeledi. Baldyń aqqýraı jáne taýly túrlerin óndiretin sharýashylyq óndirilgen ónimderin Qazaqstannyń soltústik jáne ortalyq oblastaryna jáne kórshi Reseı eline eksporttaǵan.
Sondaı-aq, oblysta bal ara sharýashylyqtardy ǵylymı súıemeldeýmen aınalysatyn «Ońtústik-Batys mal jáne ósimdik sharýashylyǵy ǵylymı zertteý ınstıtýty» JSHS-de bal ara sharýashylyǵy sektory jumys jasaıdy. Al bal aralar analyǵyn qoldan uryqtandyrýmen JK «Demıdov» aınalysyp keledi.
Aıta keteıik, óńirde «Oblystyq áýesqoı omartashylar qaýymdastyǵy» jumys isteıdi. Bul qaýymdastyqqa 250 bal ara ósirýshiler múshe. Qaýymdastyq tóraǵasy Tórehan Normuhambetov.
