Kezekti eńbek demalysynan oralǵan artıserdiń jazda qaıda baryp, qalaı demalǵandyǵy týraly aqparat eldi eleń etkizeri sózsiz. Mundaıda óner adamdarynyń biri shet el asyp, shet jerde tynyqqandy jón kórse, ekinshisi týǵan jerdiń topyraǵynan nár alyp, kógine aýnap, kóline shomylady. Ýaqytyn jan rahatynan góri shyǵarmashylyq damýǵa arnap, kıno, fılmderge túsetin, án jazyp, beıneklıpter túsiretin artıser de az emes. Búginde M.Áýezov teatrynyń akterleri 91-maýsymda tusaýy kesiletin spektákldiń premerasyna daıyndyq jumystaryn bastap ketken. Osy oraıda jańa maýsymdaǵy qarbalas jumystyń aldynda akterlerdi sózge tartyp, óner súıer qaýymdy jańalyqtarymen habardar etkendi jón kórdik.

Shynar Asqarova, Qazaqstan Jastar odaǵy syılyǵynyń laýreaty:

Men bıyl ótken jyldarǵa qaraǵanda áldeqaıda kóbirek demalyp, tynyǵyp qaıttym. Olaı deıtinim, jyl saıyn demalysym kıno salasynan, telebaǵdarlamalardan túsken usynystarmen, belgili bir jobalarmen jumys isteýmen ótetin. Sondyqtan osy jyly aldyma qandaı usynys bolsa da, qansha úlken qarjy tólense de, men bıyl aýylyma baryp demalýym kerek dep maqsat qoıdym. Sebebi, ómirden qaıtqan úlken kisiler túsime kire bastady. Aýylǵa baryp arýaqty áke-sheshelerimizge arnap as bergimiz keldi. Sóıtip, týǵan jerim Semeı oblysy Aqsýat aýdanyna bardym. Bir túsingenim, aýyl degen - seniń kindik qamyń tamǵan jer, sol jerden ǵana shynaıy qýat alyp qaıtady ekensiń. Al aýyldan qaıtyp kelgennen keıin kishkentaı qyzymnyń kóńilin qımaı Qyrǵyzstanǵa Ystyq kólge baryp demalyp qaıttyq. Sol eki ortada telefonymdy sóndirim qoısam da, meni taýyp alǵandyqtan "Úılengender" telehıkaıasyna epızodtyq keıipker bolyp tústim.

Baýyrjan Manjigitov, akter:

90-maýsymnyń jabylýynan keıin el qatarly demalysqa shyǵyp, týyp-ósken elim Ońtústik Qazaqstan oblysy, Maqtaaral aýdany,  Jetisaı qalasyna jol tartyp kettim. Týǵan jerdiń topyraǵy ystyq bolady eken, jaqyn jer bolmaǵan soń bir jylda bir, tipti araǵa eki, úsh jyldap ýaqyt salyp at izin salatyndyqtan, osy joly áıel, bala-shaǵymdy alyp bardym. Dese de, teatr basshylyǵy trýppa meńgerýshiligi qyzmetin usynǵany sebepti ózge áriptesterime qaraǵanda jumysqa erte shyǵýyma týra keldi.

Gúlnur Shyńǵysova, aktrısa:

91-maýsymǵa dekrettik demalystan keıin aıaq bastym. Osy ýaqyt aralyǵynda teatrdy, kıeli sahnany, oınaǵan rolderimdi qatty saǵyndym. Shynymdy aıtsam, joldasym ekeýimizdiń de analarymyz qaıtys bolǵan, sondyqtan balany úıge tastap, teatrǵa kelý qıyndaý boldy. Alaıda, oryn alǵan sebepterge qaramastan jumysqa shyǵýǵa bel býdym.  Qazir balama qaıyn atam men qaıyn sińilim qarap otyr. Túsinistik tanytyp, qoldaý bildirgen sol kisilerge alǵys aıtqym keledi. Kúıeýim Dáýlet Erekeshev te óner adamy, búgingi kúni ekeýimiz qurǵan dýetimizde jańa án jazyp, beınebaıan túsirýge daıyndalyp júrmiz.

Janat Tınbaev, akter:

90-maýsymnyń jabylýyna shamaly ýaqyt qalǵanda qarashańyraq teatrdaǵy eńbek jolymdy jalǵastyrýǵa qaıta keldim. Jumys bastalǵanda kıno men teatr salasyn birge alyp júrý aýyrlaý. Sondyqtan buryn túsken "İńkár júrek" telehıkaıasynyń ekinshi maýsymynyń túsirilim jumystaryn jazǵy demalysqa týralap qoıǵyzýǵa májbúr boldym. Túsirilimmen Qazaqstannyń biraz óńirlerin aralap shyqtym. Alaıda, jumys babymen júrgendikten demala almadym. Dese de, bul jumysqa degen qarqyn, ynta, talpynysymdy báseńdete almaıdy. Oǵan qosa "Sabaqty ıne sátimen" degendeı, 91-maýsymda tusaýy kesiletin M.Omarovanyń «Aqtastaǵy Ahıko-san» dramasynan 1-tergeýshiniń rolin aldym.

Daıyndaǵan Móldir Bekjan