SHQO-da úshtildilik oqý baǵdarlamasyn júzege asyrý maqsatynda deńgeılep oqytý ádisi júrgiziletin bolady. Búgingi tańda mektep muǵalimderi tildik pánderden oqytý ádistemesi boıynsha biliktiligin arttyrý kýrstarynan ótýde.
Shyǵys Qazaqstan Aımaqtyq komýnıkasıalar qyzmetinde ótken baspasóz máslıhatynda SHQO Bilim basqarmasynyń basshysy Aıjan Sadyqova málim etkendeı, qazirdiń ózinde orystildi mektepterde qazaq, al qazaqtildi mektepterde orys tilin oqytý úshin jańa oqytý júıesi qurylǵan.
– Atalǵan baǵdarlamany iske asyrý úshin negizgi eki máseleni meńgerý qajet boldy. Birinshi kezekte barlyq oqytý mekemelerinde birdeı oqýlyqtardyń bolýyn qamtamasyz etýdi kózdep otyrmyz jáne ekinshiden muǵalimderdiń kásibı biliktiligin arttyrý negizge alynyp otyr. Mysaly, birneshe jyl boıy mektepte aǵylshyn tili oqytylǵanymen, kópshilik oqýshylar birden aǵylshynda sóılep kete almaıdy. Sebebi ár mektep ár tildi oqytý úshin ártúrli avtorlardyń oqýlyqtaryn qoldanady, – dedi Aıjan Sadyqova.
Basqarma basshysy aıtyp ótkendeı, atalǵan máseleni sheshý úshin barlyq mektepterde birdeı oqýlyq qoldanyp, birdeı ádistemelik júıe qalyptastyrý qolǵa alynǵan. Aǵylshyn deńgeılep oqytý júıesi boıynsha halyqaralyq deńgeıdegi barlyq qajetti quraldar bolǵanymen, qazaq jáne orys tilderin deńgeılep oqytý ádisi buǵan deıin bolmaǵan.
– Qazaq tilin oqytý úshin Faýzıa Shamsıqyzy Orazbaevanyń ázirlegen oqýlyǵyn zertteý barysynda ol Qazaqstandaǵy qazaq tilin deńgeılep oqytýshy birinshi oqýlyq ekendigin ańǵardyq. Keıin tájirıbelik oqý quralyn Bilim jáne ǵylym mınıstrligi bekitkennen keıin, oblystaǵy 324 orystildi mektepterdiń barlyǵyna osy oqýlyq satyp alyndy, – dedi basqarma basshysy Aıjan Sadyqova.
Orys tiline kelgende másele kúrdelene túsken. Anyq bolǵandaı orys tilin qazaq mektepterinde deńgeılep oqytý ádisi Qazaqstana da, Reseıde de kezdespegen. Biraq, Máskeýde Elızaveta Hamraeva atalǵan ádis boıynsha oqýlyqtardy jańadan shyǵara bastaǵan. Keıin oblystan 8 praktık ustazdar Máskeýge attanyp, bar oqýlyqtardyń negizinde ádistemeni jasaǵan.
Qazirdiń ózinde ustazdarǵa oqýlyqtar men ádistemeler taratylyp, oqytý jumystary bastalǵan. Endi bir jyl kóleminde til ustazdary ádistemeni meńgergennen keıin, ózge pánniń ustazdary da tilderdi meńgerýge kirispek.
