Eki kún boıy alpysqa jýyq SHQO qolónershileriniń kórmesi ótken Óskemendegi qoryq murajaıdyń sol jaǵalaý kesheni halyq arasyndaǵy sándik-qoldanbaly ónerdi dáripteý men tájirıbe almasý alańyna aınaldy. SHQO týrısik aqparat ortalyǵy mýzeı-qoryqpen birigip, tuńǵysh «Altaı bazary» festıvalin uıymdastyrdy.
Mýzeı-qoryqtyń sándik-qoldanbaly óner bóliminiń aǵa ǵylymı qyzmetkeri jáne SHQO qolónershileri resýrstyq ortalyǵynyń úılestirýshisi Raısa Muhamedjanovanyń aıtýynsha, festıválge qatysýshylar jan-jaqtan jınalǵan. Semeı, Zyránov, Zaısan, Shemonaıha , Borodýlıha , Kókpekti, Qaton-Qaraǵaı , Ulan , Tarbaǵataı, Úrjar aýdandarynan jáne ózge de oblys eldi mekenderinen alpystan astam sheber óz buıymdaryn ákelgen.
«Altaı bazarynyń» alǵashqy kúni sol jaǵalaý kesheniniń «Sheberler qalasynda» tegin sheberlik sabaqtary ótti. Dástúrli qolónerge qyzyǵatyn birshama halyq jınaldy. Úlkender men balalar kıiz basýda, qaıyń qabyǵynan órim órý, teri men balshyqtan músin jasaý, kilem toqýda óz kúshteri men qabiletterin synap kórdi. Tamara Vladykına, Vladımır Osıpov, Natalá Bajenova, Nurzıa Táshimova, Vladımır Lápýnov syndy sheberler tabıǵı materıaldarmen jumys isteıtin tehnıkalarmen tanystyryp, shıkizatpen jumys isteýdiń qyr-syryn túsindirdi.
Semeıdegi «Aısha bıbi» mádenı ortalyǵynyń jetekshisi Aıman Boqpasarova janyndaǵy shı toqý stanogyna kelýshiler qatty qyzyqty. Jińishke shı sabaqtarynan turmysqa qajetti birneshe zattyń jasalatynyna kópshilik tańdanysyn jasyra almady. Bir kezderi qolónerdiń bul túri qazaq otbasyn jókemen, qalqamen, kilemshelermen, úlken qazanǵa arnalǵan qaqpaqpen qamtamasyz etken. Búginde shı stanogy halyqqa ekzotıka bolyp kórinedi, degenmen, shı - taza ekologıalyq materıal jáne qazirgi kúıýge qarsy qazan, tabalarmen salystyrǵanda áldeqaıda arzan.
Oblys halqy ǵana emes, sheteldik qonaqtar da «Altaı bazarynan» tań-tamasha áser aldy. AQSH-tan kelgen aqparattyq týr agenttigi Krıstofer Stenton óz qolymen jasaǵan bylǵary salpynshaqty maqtanyshpen kórsetti. «Mundaı is-sharalar halyq mádenıetiniń erekshelikterimen, jergilikti halyq dástúrimen keńinen tanystyrady. «Altaı bazary» kúnderi Óskemenge kelip, jolym bolǵan eken», - dedi K.Stengon.
«Altaı bazarynyń» ekinshi kúni Etnoaýyl alańynda halyq shyǵarmashylyǵy jaýharlarynyń jármeńkesi ótti.
«Búgingi jármeńkede eń jaqsy qolóner buıymdaryn tańdap alyp, olardy EKSPO-2017 kórmesine qoıamyz», - dep atap ótti R.Muhamedjanova.
