Óskemende D.Serikbaev atyndaǵy joǵary tehnıkalyq kolej ashyldy. Jastarǵa joǵary tehnıkalyq bilim alýǵa múmkindik beretin bul oqý ornyna toǵyzynshy synypty bitirgen jáne orta mekteptiń túlekteri qabyldanyp, on úsh mamandyq boıynsha oqytylady, dep jazady oblystyq «Dıdar» gazeti.
Olardyń barlyǵy - oblysymyzdyń kásiporyndaryna aýadaı qajet mamandyqtar. Búgingi tańda dızaın, metalýrg, mehanıkalyq óńdeý, ólsheý-baqylaý aspaptary jáne mashına jasaý tehnologıalary, qurylys, jol mashınalary jáne jabdyqtardy tehnıkalyq paıdalaný, avtomattandyrý jáne basqarý, taǵy basqa mamandyqtarǵa oblys ónerkásibi zárý bolyp otyr.
Kolej mamandyqtary D.Serikbaev SHQMTÝ-dyń fakúltetterine bekitilgen. Stýdentter ýnıversıtettiń bas ǵımaratynda oqıdy. Soıtip, «kolej - joǵary oqý orny» tájirıbe oqýdyń alǵashqy kúninen bastalady. Kolej stýdentterine ǵylym doktorlary men kandıdattary, RhD doktorlary men magıstrler sabaq beredi.
Kolej ýnıversıtettiń qurylymdyq bólimi bolǵandyqtan onyń túlekteri jedeldetilgen baǵdarlamamen ýnıversıtette oqı alady jáne úsh jylda joǵary bilimdi ınjener bolady. Al bakalavrıattan soń magıstratýraǵa, sonan keıin doktorantýraǵa túsýine múmkindik bar.
«Túlekterdiń básekede basymdyǵy joǵary bolady. Mamandar tehnıkalyq mamandyqtar boıynsha daıarlanady. Aımaqtyń mamandarǵa degen suranysyn eskerip, biz ýaqyt talaptaryna saı jumys isteýdemiz. Sondyqtan túlekterdiń jumysqa ornalasýyna qıyndyq bolmaıdy. Ekinshiden, SHQMTÝ-dyń materıaldyq-tehnıkalyq bazasy qýatty, munda zamanaýı zerthanalar men sheberhanalar jeterlik. «İrgetas», FESTO sıaqty zerthanalardyń ózderi nege turady. Stýdentter «Qazsınk», «TMK», «Mashzavod» sıaqty iri kásiporyndarda tájirıbeden ótedi», - deıdi D.Serikbaev atyndaǵy SHQMTÝ-dyń prorektory N.Lınok.
Kolejge qabyldanǵan qaladan tys jerden kelgen stýdentterge jataqhanadan oryn beriledi. Ýnıversıtettiń kitaphanasy - baı, sportpen, kórkem ónermen aınalysýshylarǵa barlyq jaǵdaı jasalǵan. Aıta ketetin bir másele - oqý aqysy. Kúndiz oqıtyn stýdentter úshin jyldyq aqy 195 myń, al syrttaı oqıtyndarǵa - 140 myń teńge.
