Aq mańdaıymdy aq sájdege súıdirip, Alpys eki tamyrymdy ıdirip, Qos ókpemdi duǵa tilep kúıdirip, Qos qolymdy kúnálardan tyıdyryp, Sosyn bárin qursaǵyma syıdyryp, Esesine aldym seni syı qylyp.   Alǵy únińnen tylsym daýsyn tyńdadym, Túısingendeı tirshiliktiń tyń mánin. Aǵylǵanda alǵash ret nurlandym, Aq emshekten ábilhaıat tuz dámiń.   Balam meniń baqytymnyń basy sen, Hám sońy da ózińsiń. Keýdemdegi meniń júrek –janarym, Baqytyńdy kórsin daǵy kóz ilsin.   Qaz turǵanyń qabyrǵamdy tik etti, Qaz basqanyń qadamymdy údetti. Meniń taǵdyr terezeme bal tiliń, «Ana» deıtin altyn tájdi gúl ekti. Ós qulynym, órle bıik túspegin, Sen tatpastan tirlik nárin ishpedim. Qalamaımyn «Han basyńa» qus túgil, Kóbelektiń kóleńkesi túskenin.   Ós qulynym, órle kóńil maqtanym, Senen ózge ómirdi izdep tappadym. Qalamaımyn tabanyńa tas túgil, Topyraqtyń tozańynyń batqanyn.   Balam meniń baqytymnyń basy sen, Hám sońy da ózińsiń. Keýdemdegi meniń júrek –janarym, Baqytyńdy kórsin daǵy kóz ilsin.  

Bul shetkeri baqta, Tynyǵa alar ma ekem. Bultsyzdyq sirá, qaı jaqta, Eı, baǵzy meken!   Aýama ańqytty kimder, Beıtanys ápsanalaryn. Mineý bir shesheksiz gúlder, Meniń bastamalarym.   Qolyna ap qara noqtasyn, Bireýler jeligýde me. Kemirip qara aǵash basyn, Jalǵyz júr eligim nege.   Qýyma qospapty qosaq, Qanatyn qalaı ol jaısyn. Súıekten sybyzǵy jasap, Baýrymdy ezgen bul qaısyń.   Eı, Aýyl! senbisiń álde, Mıymdy mazalaı bergen. Sóndi ishim, kóndi ishim álde, Tek seniń yrqyńa ergen.   Qańǵyrǵan bulttardan oqyp, Ózińdi otyrmyn nege. Qańbaqtan jibergen toqyp, Men daǵy jetim bir keme.   Mendikke syzylǵan syzý – Áli de kóp jerge baram. Baǵymnan jel tursa túzý, Túbinde oralam saǵan. Eı, Aýyl! Betin tyrnap qanatty da bulttyń kún, Yrshyp taýdyń jelkesine buǵyndy. Yshqynyp bult demin qaıta úrgende, Ysqyryp kún taýdan qulap jyǵyldy.   Qaraqshy tún shatyryna jasyryp, Urlap alǵan jaquttaryn sanap tur. Al esikten bir shekesin qyltıtyp, Aı urlanyp qarap tur.   Úlek bozdap, Qoı mańyrap tyndy mań, Janýar ǵoı jaqut oǵan ne kerek. Qara aspanǵa bireý otyr telmirip, “ Bul asyldar meniki emes nege ” dep. İńir ...  

Áıteýir batady maqul kún, Aıtaryń osy ma, aqyldym. Janynda jalpıyp tún otyr, Jubatý tilegen aqynnyń.   Erteń dep ekeýi syrlasar, Bireýi múlgıdi muńǵa  sál. Oıynda ózgeniń ókpesi, Óziniń óksigin kim basar.   Tún súıep aqynǵa, Aı basyn, Qaıǵylas qylmaǵan qaı ǵasyr. Jerdegi jalǵannyń jarlysy, Aspanda baqıdyń aınasy.   Qara tún qasynda túnegen, Jaryqqa etpeıdi kim eleń. Juldyzǵa jabysyp jaryq etti, Paraqtan býsanǵan bir óleń.  

Jylqyda júzden bir, myńnan bir, Tuqymy tulpardyń. Al adam júzden júz, myńnan myń, Suńqar kil. Týada tulparsyń, Tuıaǵyń janshylsa keıinnen janshyldy. Joǵaltqan shyǵarsyń, Qyzyl qamshyńdy.. *** Aldymen janatyn juldyzdar, Sáýlesi tómenge sozylǵan. Shaıyrdyń oılaryn oqıdy, İńirdiń tilimen jazylǵan.   Oqylǵan oılardan parlap nur, Janǵanda tórinde aspannyń, Qarańǵy atymen joǵalar, Joǵalar ol sáýle shashqan kún.   Tarıh jarqyrap sol nurmen, Shaıyrdyń enshisi bóliner. Búgin men erteńniń arasy, İńirdiń kózine kóriner.

Aq jańbyr aıyqqan sátte, Japyraqqa tundym. Kári kóz sýalǵan sátte, Topyraqqa sińdim.   Naızanyń ushynan syrǵyp, Qyna bop qaldym. Sábıdiń kózinen yrǵyp, Kúná bop qaldym.   Qamsyzdar qasiret qushyp , Omyraýyn jýdym. Jaraly jatyrǵa túsip, Jadygoı týdym.   Dirildep aqynnyń qoly, Qalamǵa qattym. Teńizge tolqyǵan doly, Qosylmaı jattym...