Ońtústik Qazaqstan oblysyndaǵy Maqtaaral aýdanynyń dıqandary baý-baqshadan buryn-sońdy bolmaǵan mol ónim alyp jatyr.
Sharýalar kúni búginge deıin 126 myń tonnadan astam qarbyz ben qaýyn jınaǵan. Odan 7,8 mlrd teńge tabys taýypty. Myrzashóldik dıqandar ónimniń kóp bóligin Reseı men Belarýs elderiniń naryǵyna eksporttaǵan. «Qara kúzge deıin alqaptaǵy ekinshi ret egilgen qaýyn-qarbyz da pisip qalady», - deıdi olar.
Dámi til úıiretin qaýynnyń alǵashqy piskenin óz qolymen julǵan dıqannyń kóńili toq. Óıtkeni kóktem qolaıly bolyp, erte qımyldaǵan sharýa mol ónimin alyp jatyr. Namazbaı buǵan deıin 10 gektarǵa egilgen qarbyzynan 500 tonna ónim alǵan. Ony Reseı naryǵyna jiberipti. Endi Myrzashól qaýynyn ishki jáne syrtqy naryqqa jóneltip jatyr.
Namazbaı Kývatov, dıqan:
- Reseıden suranys boldy. Vagondap jiberdik. Ol jaqta deldalymyz bar. Tapsyrys bolady, soǵan qaraı jiberip jatyrmyz. Jylda istep júrgen tirligimiz osy.
Ádette maqta ósirýmen ǵana aınalysatyn maqtaaraldyq sharýalar sońǵy jyldary baý-baqsha ónimderine kóptep den qoıa bastady. «Óıtkeni jylyna eki ret ónim alýǵa bolady, oǵan qosa paıdasy da aq altynnan kem emes», - deıdi dıqandar. Al, bıyl sharýalar úshin tipti qolaıly boldy. Aqpannyń sońynda jer jyrtylyp, naýryzda alǵashqy dán sebildi. Dıqandar jalpy sońǵy jyldary Jer-ana mundaı ónim bermegenin aıtady.
Jamantaı Beısenbaev, Maqtaaral aýdanynyń ákimi:
- Maqtaaral aýdany boıynsha búgingi tańda 23 myń gektar jerge baý-baqsha egilgen. 91,500 tonnasyn Belarýs, Reseıge jiberdik. Óndirgen ónimniń quny 4,8 mlrd bolatyn ónimdi shetelge jiberdik. Shymkent, Almaty, Astana, soltústik aýdandardy qamtydyq. Bul jerlerge 2,8 mlrd teńgeniń ónimin jiberdik.
Sharýalar erte kóktemde 1,5 myń gektarǵa egilgen qyryqqabatty satyp úlgergen. Ol jerlerge qaıta egilgen baqsha ónimderi qara kúzde pisedi. Qaýyn-qarbyz alqaptan tikeleı suryptalyp artylady. Ony naryqqa túspeı turyp arnaıy sanıtar mamandar tekserýden ótkizedi. Oblystyq Tutynýshylar quqyǵyn qorǵaý departamentiniń mamandary bıyl baqsha ónimderinen ýlanyp túsý jaǵdaıy tirkelmegenin aıtyp otyr.
Jumaǵalı Mýzafarov, oblystyq Tutynýshylar quqyǵyn qorǵaý departamenti tehnıkalyq retteý bólimi basshysynyń mindetin atqarýshy:
- Bizge nıtrattan ýlaný jónindegi shuǵyl habarlama kelip túsken joq. Bul boıynsha tipti shaǵym da joq. Qaýynda ruqsat etilgen nıtrat kórsetkishi 90 bolsa, qazir 87-85-ke deıin tómen kelip jatyr. Tipti 40-ty da kórsetkenderi bar. Al, basqa kókónister, mysaly, pıaz, bolgar buryshy jáne taǵy basqalarynda kórsetkish óte tómen.
Dıqandardyń aldy qaýyn-qarbyzdyń ár gektarynan 15-20 tonnadan ónim alǵan. Bıyl oblys boıynsha 1 mlrd 500 myń tonna baý-baqsha ónimderin jınaý josparlanyp otyr. Bul – rekordtyq kórsetkish. Osylaısha jyldaǵymen salystyrǵanda eselep ónim alyp jatqan sharýalar ala jazdaıǵy eńbekteriniń aqtalǵanyna qýanyshty.
