Ońtústik Qazaqstan oblysynda «Bereke» baǵdarlamasymen jeke qosalqy sharýashylyqtar negizinde bir myń shaǵyn mal bordaqylaý alańyn qarjylandyrý josparlandy, dep habarlady «Aýyl sharýashylyǵyn qarjylaı qoldaý qory» AQ baspasóz qyzmetinen.

«Sıyr etin óndirý úshin ASHM, jeke qosalqy sharýashylyqtar negizinde 5-20 İQM basyn bordaqylaıtyn shaǵyn mal bordaqylaý alańdaryn qarjylandyrýdy josparlady. Mal soıý beketteri bordaqylaýmen aınalysatyn jeke qosalqy sharýashylyqtardan qurylǵan aýylsharýashylyq kooperatıvterdiń negizinde uıymdastyrylady. 

2016 jyly bul sharalardy júzege asyrýǵa «Jumyspen qamtý 2020 jol kartasy» baǵdarlamasynyń qarjysy baǵyttalady. Jyl basynan Aýyl sharýashylyǵyn qarjylaı qoldaý qory jylpy kólemi 9,2 mlrd. teńgege 3,7 myń jobany qarjylandyrdy. Onyń ishinde Ońtústik Qazaqstan oblysynda 2,4 mlrd. teńgege 913 qaryz alýshy qarjylandyrylǵan. Shaǵyn nesıe retinde berilgen qarajattyń 70% mal sharýashylyǵyn damytýǵa jumsaldy», - delingen habarlamada. 

JQJK 2020 qatysýshylaryn atalǵan baǵytta qarjylandyrý úshin Aýyl sharýashylyǵyn qarjylaı qoldaý qory tarapynan «Bereke» baǵdarlamasy ázirlendi. 

Nesıeniń maqsatty baǵyttalýy - iri qara, usaq múıizdi mal, jylqy, basqa da aýylsharýashylyq mal men qusty bordaqylaý men aýylsharýashylyq ónim alý úshin satyp alý, sondaı-aq, mal azyq satyp alý bolyp tabylady. Qaryzdyń maksımaldy somasy - 3 mıllıon teńgege deıin, qaryzdy merzimnen buryn ótegen qatysýshylar úshin - 5 mıllıon teńgege deıin, qaryzdyń merzimi - 4 jylǵa deıin. 500 myń teńgege deıin qaryzdar boıynsha syıaqy ústemesi - jyldyq 4,8%, 500 myń teńgeden asatyn qaryzdar boıynsha - jyldyq 6%. Jyldyq tıimdi syıaqy ústemesi - sáıkesinshe, 5% jáne 6,7%. 

Respýblıka boıynsha 2016 jyly 55 myńǵa jýyq mal basyna arnalǵan 7 myńnan astam shaǵyn mal bordaqylaý alańy qarjylandyrylady dep kútilýde. Bul maqsatta 10,9 mlrd. teńge baǵyttaý josparlanǵan. Onyń ishinde Ońtústik Qazaqstan oblysynda - 7,9 myń mal basyna arnalǵan 1000 otbasylyq shaǵyn alań 3 mlrd. teńgege.