Qala turǵyndary Myrzabek jáne Roza Shymyrbekovter kópqabatty úıde tursa da, shaǵyn aýlasynda alma, júzim, jańǵaq jáne órik sekildi aǵashtardy ósirip, jemisin kórip otyr. Sondaı-aq, aınalasyn kóriktendirip, úlkenderge qalanyń qym-qýyt tirliginen bir sát bolsa da demalýyna jáne balaqaılardyń jazdyń aptap ystyǵynda kóleńkede oınaýy úshin yńǵaılastyrǵan.
Qos zeınetker «Nursát» shaǵynaýdanyndaǵy №101 úıde turady. Olar munda osydan toǵyz jyl buryn kóship kelipti. Alǵashynda qurylys qarqyndy júrip jatqandyqtan, aınalada birde-bir jasyl jelek bolmaǵan eken. Sodan, aýlasyna raýshan gúl otyrǵyzyp, aǵash ekti. Sondaı-aq, Myrzabek Shymyrbekov óz qolymen ekken júzim aǵashtary úıdiń kire berisine kúnnen qorǵaıtyn pana bolýmen qatar, jemisin de bere bastady. 

– Qol qýsyryp otyrmaı, úıdiń aınalasyna bir sát kóńil bólýge den qoıdym. Aldymen aýlany rettep, gúl ektik. Aǵashtan jasalǵan úlken ústel qoıdyq. Onda osy úıdiń turǵyndary, ásirese ózimiz sekildi zeınetkerler shahmat pen nardy oınaıdy. Maqtan tutar kórshimizdiń biri – fılologıa ǵylymdarynyń doktory, profesor Mekemtas Myrzahmetov. Jazdygúni júzim keremet kóleńke berip turady. Aınalamyzdy jasyl jelekpen kómkereıik degen maqsatta josparlaǵan oılarymyz birtindep júzege asa bastady. Qazir aýlaǵa úsh túp jańǵaq aǵashyn ektim. Kún saıyn tańerteń turyp, olardy shelektep sýaramyn. Al úıdiń artynda úsh túp alma men órik ájepteýir saıa. Olardyń jemis bergenine úsh jyl boldy. Dál qazirgi ýaqytta alma ýyljyp pisip tur, – deıdi zeınetker. 
Shymyrbekovter otbasy aýlasyn kóriktendirip qana qoımaı, onyń tazalyǵyna da asa mán beredi. Úıdiń aınalasyn taza ustaý týraly kórshilerine únemi eskertý jasap otyrady. Olar muny tek sóz júzinde ǵana emes, is júzinde de kórsete bildi. Máselen, úıdiń kire berisine qoqys tastaıtyn jáshik ornatyp qoıǵan. Tipti jas balaǵa deıin qoqysty sonda tastaý kerektigin jaqsy túsinedi. Qazirgi kezde kópqabatty úılerdiń esikteri eriksiz jarnama ornyna aınalǵan. Túrli-tústi qaǵazdar jabystyrylyp, kire beristiń ajaryn ketirip tur. Al bul úıdiń esiginen ondaı birde-bir jarnama qaǵazyn kórmeısiz. Bul máseleni sheshý úshin 

Myrzabek Shymyrbekov esiktiń eki janyna arnaıy taqta ilip qoıǵan. Jumys usynyp, habarlandyrý ilgisi kelgender úshin taqtalar keremet múmkindik boldy. 
Myrzabek aǵa men Roza apaı aldaǵy ýaqytta balalar oınaıtyn alańshany kóriktendirsek dep otyr.