Úkimet Úıinde QR Premer-Mınıstriniń orynbasary Darıǵa Nazarbaeva respýblıkalyq búdjet jáne halyqaralyq uıymdarmen birlesken jobalarmen qarjylandyrylatyn saraptamalyq jáne áleýmettik zertteýler máseleleri boıynsha keńes ótkizdi, - dep habarlaıdy Qamshy.kz pm.kz – ke silteme jasap.

Keńes barysynda D. Nazarbaeva taqyryptardyń qaıtalanýyn joıyp, júrgiziletin zertteýler ádistemesine ortaq talaptar bekitýdi tapsyrdy.

«Mindetti túrde qazaqstandyq mazmun bolýy tıis. Biz tapsyrys berýshilermiz, bizdiń óz talaptarymyz bolýy tıis. Eger bul talaptar bizde naqty kórsetilmegen bolsa, biz olardan jumys sapasynyń qandaı kepildigin kútemiz. Bul jumysty jyldyń sońyna deıin Ulttyq ekonomıka mınıstrligi bilim jáne ǵylym, sonymen qatar qarjy mınıstrligimen birlesip jónge qoıýy tıis», - dedi D. Nazarbaeva.

Budan bólek, QR Premer-Mınıstriniń orynbasary sońǵy úsh jylǵa respýblıkalyq búdjetten qarjylandyrylatyn zertteýlerdiń tıimdiligine taldaý jasaýdy tapsyrdy.

«Eń bastysy - olardyń nátıjelerine praktıkalyq qoldanys tabý. Ol úshin zertteýler nátıjeleri men memlekettik vedomstvolarǵa berilgen usynystardyń keń taralýyn qamtamasyz etý qajet. Sonymen qatar, tapsyrys berilgen zertteýlerdiń qoljetimdiligin jaqsartý qajet, barlyǵy ashyq jarıalymda bolýy tıis», - dedi D. Nazarbaeva.

Otyrys barysynda QR ulttyq ekonomıka mınıstriniń orynbasary Mádına Ábilqasymova atap ótkendeı, aǵymdaǵy jyly memlkekettik organdar 2017-2019 jyldarǵa jalpy somasy 2,8 mlrd teńge bolatyn 13 zertteý júrgizý qajettiligi týraly qosymsha usynǵan. Sonymen qatar, halyqaralyq uıymdarmen yntmaqtastyq aıasynda QR Úkimeti 10-nan astam birlesken zertteý júrgizý josparlanyp otyr.