Juma namazyna bara jatyr edim. Jol ústinde eki balasyn jetelep ketip bara jatqan áıeldi balalarymen birge mashınama otyrǵyzyp ala kettim.
Qarasam orys ultynyń áıeli eken. «Qaıda jetkizip tastaıyn?»,- dep edim «juma namazyna meshitke bara jatyrmyn»,- degenine tańyrqaı qaraǵanymdy sezgen ol áńgimesin bylaı sabaqtap áketip edi:
- Myna otyrǵan ulym alty jasqa tolǵanda qatty aýyryp aýrýhanaǵa tústi. Balamdy zerthanalyq saraptamadan ótkizgen dárigerler onyń dıagozyn «obyr (rak)» dep aıtqanda maǵan aspan aınalyp jerge túskendeı boldy. Kúndiz kúlki, túnde uıqydan qaldym.
Balama em-sharalar jasap júrgen dárigerler «balańyzdy úıde kútseńiz qaıtedi»,- dep sharasyzdyq tanytqan soń ne deıin «tar qursaǵyma syıǵan balam, syrtyma da syıar», - dep balamdy aýrýhanadan shyǵaryp úıde kúttim.
Balamnyń qınalǵanyn kórgende oǵan kórsetpeı jylap - syqtap alamyn. Ondaı jaman aýrýdy adam balasyna bermesin. Áıteýir demıdrol, morfın berip, balamnyń aýrýyn basqan bolamyn. Qalqıyp qalǵan balamdy ólimge qalaı qyıayn, emdetem dep talaı táýipterge kórsetip «barmaǵan jerim, baspaǵan taýym qalǵan joq», shirkeýdiń de tabaldyryǵyn tozdyrǵan shyǵarmyn, biraq bárinen de qaıyr bolmady.
Osyndaı aýyr qaıǵymen balamdy arqalap kóshe boılap kele jatsam, aspanǵa áýelete shyqqan «Allahý Akbar, Allahý Akbar» degen áýezdi ún tula boıdy shymyrlata ózine tartyp bara jatty. Bul qudiretti ún Naýan hazireti meshitiniń munarasynan aıtylyp jatqan azan eken.
Azannyń áýezdi úni kóńilge úmit uıalatyp, meshitke kirsem, múmınder juma namazyn oqýǵa sapta tur eken. Balam ekeýmiz namazǵa turǵan adamdardyń sońǵy jaǵyna otyra qalyp, ımamnyń kúmbirlegen áýezdi daýsyna uıyp, qudiretti Alladan balamnyń aýrýyna shıpa tilep, qulshylyq etýmen boldym. Sodan keshke deıin Allanyń úıinde balamnyń denine saýlyq tilep, meshitten qas qaraıa úıge qaıttym.
Úıge kele balamdy tósekke jatqyzyp, janyna qısaıa ketip edim, kózim ilegip ketipti. Bir kezde kúbirlegen daýystan oıansam, balam «Mama sý bershi»,- dep jatyr eken, sodan aýzyna sý tamyzdym. Tańerteń turyp balamnyń kózine kózim túsip edi, janarynan jarq etken úmit sáýlesin kórip shaılyǵyp qalǵan júregimde senim paıda boldy.
Balam «tamaq ishkim keledi» degen soń qustyń etinen daıyndaǵan sorpany azdap berip edim rahattana ishti. «Syrtqa shyǵarmaı boıyna sińimdi bolsa eken», - dep baýyr etim ezile tileýmen boldym.
Tamaqtan soń balamnyń boıy jipsip uıyqtap ketti. Janynda otyryp qubylaǵa betimdi qaratyp, Alladan balamnyń amandyǵyn tileýmen boldym. Birazdan soń, uıqysynan oıanǵan balam, taǵy tamaq suraǵanda qýanǵannan jylap jiberippin...
Sol kúnnen bastap balama az-azdap qazaqtyń qymyz, aıran, irimshik, qazy, qarta basqa da taǵamdaryn usynǵanda, ony rahatanyp jegenin kórgende meniń de janym jadyrap kóńilim jaı tapty. Eń negizgisi balamnyń demıdrol, morfınge degen táýeldiligi joıyla bastady.
Sodan balamnyń beti qaraı bastady, juma saıyn meshitke baryp, tilek tilep, balama Alladan saýlyq tileýmen júrdim.
Birde dárigerge aparyp balamdy teksertip edim, onyń boıynan «obyr» belgisin tabylmaı «balańdy qalaı emdediń»,- dep tańǵala suraǵandaryna «Allanyń sharapatynyń arqasynda jazyldy»,- dep bar bolǵan jaǵdaıdy aıtyp edim, ol maǵan sendi me, senbedi me bilmeımin, al men bul shıpany qudiretti Allanyń meıiri dep bildim.
Alla taǵalanyń sharapaty arqasynda balam aýrýynan aıyǵyp, ekinshi ret dúnıege kelgendeı boldy. Qazir balam 12 jasqa keldi. Sodan beri úzbeı juma namazyna qatysyp, Allaǵa qulshylyq etip júrmin. Juma namazyna qatyspasam, balam qaıtadan aýyryp qalatyndaı qorqamyn. Búgin qataryma qyzymdy qosyp aldym.
Qazir eki oıly bolyp júrmin, ıslam dinine kirsem be deımin. Imammen sóılesip edim, onyń aıtýynsha paıǵambarymyz Muhammed (s.ǵ.s.) Allanyń jer betine jiberilgen sońǵy elshisi jáne ıslam dini bir ǵana ultqa emes búkil adamzatqa túsirilgen din ekenin bildim, múmkin sol sebepti shyǵar biz sıaqty «adasqandarǵa» Allanyń sharapaty tıgeni.
Ózimniń týǵan -týysqandaryma Allanyń haq ekenin, onyń qudiretiniń jáne meıriminiń sheksiz ekenin aıtyp otyramyn,- dep áńgimesin aıaqtaǵan edi hrıstıan dininiń ókili.
Namazdan soń, álgi orys áıeldiń balalarymen júzderin qubylaǵa buryp, Allaǵa taǵzym etip otyrǵanyn kórip, shynynda bular Allanyń meıirimine bólenetin jandar eken dep oıladym...
Úıge kelgen soń orys áıeliniń áńgimesin kelinshegime aıtyp edim, onyń da kózi jasaýrap «balamyz aýrýhanada jatqanda, dárigerler onyń bir búıregin alyp tastaımyz degenin bilesiń ǵoı, sol kezde men de Naýan hazireti meshitine baryp, Allaǵa qulshylyq etip, balamnyń aýrýyna shıpa tilegenmin, sodan balama Allanyń sharapaty tıip, aýrýynan jazylyp ketti», - dedi.
R/S. Birde juma namazyna baryp edim, tanys orys áıeli balasymen meshit janynda tur eken, amandasyp edim, ol meni tanyp «balam, ıslam dinin qabyldady»,- dedi júzi bal - bul jaınap. Men de onyń bul sheshimine rıza boldym. Iá, Alla Taǵalanyń meıirimi de, qudireti de sheksiz ǵoı.
Ersin Erǵalıev
