Búgin oblys turǵyndary áýejaıdan Olımpıada oıyndarynda óner kórsetip, el namysyn qorǵaǵan jerles sportshylaryn qarsy aldy, - dep habarlaıdy Qamshy.kz.

Rıoda ótken HHHİ jazǵy olımpıada oıyndarynyń úsh qarǵyp sekirýden qola júldegeri Olga Rypakovamen birge aýyr atletshi Denıs Ýlanov, dısk laqtyrýshy Evgenıı Labýtov, jeńil atletshi Irına Smolnıkova, 400 m qashyqtyqqa júgirýden jeńil atletshi Elına Mıhına men baıdarkada jekeleı esýde óner kórsetken Ekaterına Smırnova keldi.

Dańqty sportshylardy jankúıerler atynan SHQO ákiminiń orynbasary Jaqsylyq Omar quttyqtady.

– Olga Rypakova – Olımpıada oıyndaryna óner kórsetip, Qazaqstan atynan jeńil atletıkadan júldeli bolǵan jalǵyz sportshy. Elbasymyz aıtyp ótkendeı, Olga Rypakova tek sportshy ǵana emes, sonymen qatar ol batyr ana, – dedi Jaqsylyq Omar.

Óz kezeginde Olga Rypakova jankúıerlerine kórsetken qoldaýlary úshin alǵysyn bildirdi.

 – Rıoda ótken Olımpıadadan keıin men taǵy bir jarysqa óner kórsetýge attanyp kettim. Sondyqtan, eki saıystan keıin Shyǵys Qazaqstanǵa, Óskemenge jetý men úshin úlken qýanysh. Ár kún saıyn áleýmettik jelilerde qoldaý men tilek bildirgenderińiz úshin alǵys bildiremin. Sizderdiń qoldaýlaryńyzsyz bizdiń jetistigimiz de bolmas edi, – dedi Olga Rypakova.