Búgin Qazaqstan Prezıdenti Nursultan Nazarbaev Qytaıǵa jumys sapary aıasynda QHR Tóraǵasy Sı Szınpınmen kelissózder júrgizdi. Kezdesýdiń qorytyndysynda eki Memleket basshysynyń qatysýymen 4 kelisimge qol qoıyldy, - dep habarlaıdy Qamshy.kz QazAqparatqa silteme jasap.

Atap aıtqanda, Qazaqstan Respýblıkasy Úkimeti men Qytaı Halyq Respýblıkasy Úkimeti arasyndaǵy 2004 jylǵy 17 mamyrdaǵy QR-QHR yntymaqtastyǵy jónindegi komıtet qurý týraly kelisimge qosymshalar engizý týraly hattama rásimdeldi. Qujatqa Qazaqstan tarapynan elimizdiń Syrtqy ister mınıstri Erlan Ydyrysov pen qytaı tarapynan QHR Syrtqy ister mınıstri Van I qol qoıdy.   

QR Ulttyq ekonomıka mınıstri Qýandyq Bıshimbaev pen QHR Damý jáne reformalar jónindegi memlekettik komıtetiniń tóraǵasy Súı Shaoshı «Nurly jol»  men «Jibek joly ekonomıkalyq beldeýi» baǵdarlamalaryn túıindestirý jónindegi yntymaqtastyq josparyn rásimdedi. 

QR Aýyl sharýashylyǵy vıse-mınıstri Gúlmıra Isaeva men QHR Sapaǵa qadaǵalaý jasaý, ınspeksıa jáne karantın bas basqarmasynyń basshysy Chjı Shýpın eki eldiń vedomstvolary arasynda Qytaıǵa Qazaqstannan eksporttalatyn jylqylarǵa qoıylatyn karantın jáne  saýlyq talaptary boıynsha  jáne Qazaqstan Respýblıkasyna Qytaı Halyq Respýblıkasyna soıa daqyldaryn eksporttaý úshin fıtosanıtarlyq talaptar boıynsha QR Aýyl sharýashylyǵy mınıstrligi men QHR Sapaǵa qadaǵalaý jasaý, ınspeksıa jáne karantın bas basqarmasynyń arasyndaǵy hattamalardy bekitti.

Aıta keteıik, Qazaqstan Respýblıkasynyń Prezıdenti Nursultan Nazarbaev 4-5 qyrkúıekte Hanchjoýda ótetin G-20 Samıtine qatysý úshin Qytaıǵa keldi. Sonymen qatar  Memleket basshysynyń Samıt aıasynda delegasıalar basshylarymen kelissózder ótkizýi josparlanǵan.