Shetelden kelgen qazaqtar Qytaıǵa keri qaıtqansha, Qazaqstanda sottalyp ketkendi nemese "bosqyn" degen resmı ataq alǵandy jón kóredi. Óıtkeni olardy vızalyq rejımdi buzǵany úshin qamaýǵa alyp, artynsha elden qýyp jatyr eken. Tipti keıbiriniń 5 jyl atajurtqa kirýine tyıym salynypty, - dep habarlaıdy Qamshy.kz 31-arnaǵa silteme jasap.

Qytaıdan mektep bitirip, Qazaqstannan joǵary bilim alamyn dep kelgen Baýyrjan búginde ýnıversıtette emes, basyn arashalap qalý úshin qujat jınap júr. Byltyr vızamen kirip, oralman kýáligin ıemdengen ol yqtıar hat alamyn dep júrgende báleli bolǵan. Almaty oblysynyń kóshi-qon polısıasyndaǵylar "vızańnyń merzimi ótip ketken" dep, isin sotqa jóneltipti.

BAÝYRJAN MÁDEN, Oralman:

- Sot bylaı sheshim shyǵardy ǵoı: "Sen Qytaıǵa ketesiń 5 jylǵa. 15 kúnge qamalasyń. Sen 1 jyldyń ishinde Qazaqstannyń zańyn 2 ret buzdyń" dedi. Sodan endi ketetindeı emes. Qalaı ketem? Qytaıda týysqanym joq. Bári osy jaqqa kóship kelip alǵanbyz.

Baýyrjannyń ózi zańdy buzǵanyn moıyndap otyr. Biraq, elge jolatpaı qýalaıtyndaı aýyr qylmys jasamaǵanyn aıtyp, jeńildik suraıdy. Bul - bir ǵana Baýyrjannyń máselesi emes. Qanshama oralmannyń túıtkilin tyńdap júrgen Aýyt Muqıbek, osyndaı jazaǵa ilikken júzdegen qandasymyz atajurtqa keletin kúndi ańsap, kún sanap júrgenin aıtady.

AÝYT MUQIBEK, Aqyn:

- Meniń oıym buny depýtattar arqyly qansha adam osy tártiptik jazaǵa tartylǵanyn anyqtaý kerek. Sosyn endi bıyl 25 jyldyq toı ǵoı. Bólinip qalǵan otbasylardy qosý úshin raqymshylyq jasaý kerek sıaqty. Ony usynys etý kerek. Bas prokýratýra men joǵarǵy sotqa hat jazyp, 1 jolǵa raqymshylyq jasasa bólinip ketken aǵaıyndar bir-birine qosylady dep oılaımyn.

Bul jaǵdaı týraly depýtattardyń da pikirin bildik. Májilismender byltyr qabyldanǵan zańda bári qarastyrylǵan, tek sony buzbaý kerek edi deıdi.

QÝANYSH SULTANOV, QR Parlamenti Májilisiniń depýtaty:

- Qazir oralmandardyń jaǵdaılary jeńildengen. Olardyń azamattyq alýy da jeńildendi. Byltyr biz zań qabyldadyq. Sol zańda kóp ózgerister engizdik.

BAQYTBEK SMAǴUL, QR Parlamenti Májilisiniń depýtaty:

-  Zańnyń bir nemquraıly jerleri bolsa, jergilikti organdarmen, hat júzinde berip jatsa biz qoldan kelgenshe qarastyraıyq.

Al quzyretti organdardy aralap, jeńildik suraǵan Baýyrjan Qazaqstannan shyǵarylý týraly sheshimdi oryndamaǵany úshin taǵy da jazaǵa tartylýy múmkin ekenin biledi. Biraq, basqa amaly joq.

BAÝYRJAN MÁDEN, Oralman:

-  Qamalǵanym durys qoı. Qytaıǵa baryp, tentirep 5 jyl júrip shyǵyp-kire almaı júrgennen osy Qazaqstanda jata bereıin de qaı jerde bolsa da. Qamasa da meıli endi, ne isteımin? + Tym bolmaǵanda "bosqyn" mártebesin berse de Qazaqstanda qalsam degen úmittemin.

Qazirgi tańda dál osylaı zań aıasynda elden qýylyp jatqandardyń naqty sany qansha ekeni bilmek bolyp ókiletti organdarǵa suraý saldyq. Bul máseleniń sheshimin tappaq bolǵan saýalymyzǵa kóshi-qon polısıasy jýyq arada jaýap beremiz dep otyr.

Qytaıdan elge oralǵan taǵy bir qandasymyz Mahsutqan Tursynbaqtyń da shekaradan ótý tártibin buzdy degen aıyppen elden shyǵarylǵany týraly jarıalaǵan bolatynbyz.