Elbasy Nursultan Nazarbaev Ózbekstan Respýblıkasynyń Prezıdenti Islam Kárimovtiń qaıtys bolýyna baılanysty Ózbekstan Respýblıkasy Olıı Májilisi Senatynyń tóraǵasy Nıgmatılla Iýldashevke kóńil aıtý jedelhatyn joldady, - dep habarlaıdy Qamshy.kz Prezıdenttiń Baspasóz qyzmetine silteme jasap.

Memleket basshysy Ózbekstan Respýblıkasynyń Prezıdenti Islam Abdýǵanıuly Kárimovtiń dúnıeden ótkeni týraly habardy zor kúızelispen qabyldaǵanyn aıtqan.

«Qazaqstandyqtar bul mezgilsiz ári orny tolmas qazanyń aýyrtpalyǵyn baýyrlas Ózbekstan halqymen birge bólisedi. 30 jyldaı qanattasa jumys istegen dosymnan aırylǵanyma qaıǵyramyn», – delingen kóńil aıtý jedelhatynda.

Sondaı-aq, Nursultan Nazarbaev eldiń ekonomıkalyq áleýetiniń damýyna, onyń halyqaralyq bedeliniń ósýine, qoǵamnyń ál-aýqatynyń artýyna yqpal etken aýqymdy ózgeristerdiń júzege asyrylýy Ózbekstan Respýblıkasy táýelsizdiginiń bastaýynda turǵan Islam Kárimovtiń esimimen baılanysty ekenin atap ótti.

«Ol óziniń búkil ómirin týǵan halqyna qaltqysyz qyzmet etýge arnady,  árdaıym Qazaqstannyń senimdi dosy boldy jáne bizdiń halyqtarymyzdyń arasynda dostyq pen tatý kórshiliktiń nyǵaıa túsýine úlken úles qosty», – delingen jedelhatta.

Sońynda Qazaqstan Prezıdenti Islam Abdýǵanıuly Kárimovtiń týystary men jaqyndaryna jáne eldiń basshylyǵy men baýyrlas Ózbekstan halqyna qatty qaıǵyryp kóńil aıtty.