Ózbekstan astanasynyń birneshe myń turǵyny Islam Karımovtiń denesin áýejaıǵa alyp ótetin qalanyń ortalyq kósheleriniń boıyna shyqty, - dep habarlaıdy reseılik RBK agenttigine silteme jasap QazAqparat.
Eske sala ketsek, el bıligi Ózbekstan basshysynyń qaıtys bolǵanyn resmı 2 qyrkúıekte habarlaǵan edi. Islam Karımovti 3 qyrkúıekte Samarqand qalasyna jerleıdi. Búgin tańerteń Tashkenttiń ortalyq kósheleriniń eki jaǵyna qoldaryna gúl ustaǵan qala turǵyndary tizildi. Qozǵalys bóligine jaqyn tusqa eki qatar polısıa qyzmetkerleri qoıylǵan. Kórshi kóshelerde kólik qozǵalysy toqtatylǵan. Sondaı-aq, qalada poıyzdardyń júrý kestesi de ózgertilgen.
Jergilikti turǵyndar kóshbasshymen qoshtasý úshin tańǵy 4.00-den bastap jınala bastapty.
Tashkent turǵyndary qoshtasý rásiminen sýretter men vıdeolar jarıalap, #moıprezıdent #withKarimov heshtegterin qoldanyp jatyr. Al osyǵan deıin Ózbekstan prezıdentiniń kishi qyzy Lola Karımova Instagram jelisinde ákesiniń qaıtys bolǵanyn málimdedi. "Ol bizdi tastap ketti... Sóz tańdap otyryp, ózim sene alar emespin", - dep jazdy ol áleýmettik jelidegi resmı akkaýntynda.
Eske salaıyq, Ózbekstan prezıdenti Islam Karımov 78 jasynda qaıtys boldy. Islam Kárimovti jerleý rásimi Samarqanda 3 qyrkúıekte ótedi. Prezıdenttiń qazasyna baılanysty Ózbekstanda úsh kúnge qaraly kún jarıalanady. Elbasy Nursultan Nazarbaev Ózbekstan Respýblıkasynyń Prezıdenti Islam Karımovtiń qaıtys bolýyna baılanysty Ózbekstan Respýblıkasy Olıı Májilisi Senatynyń tóraǵasy Nıgmatılla Iýldashevke kóńil aıtý jedelhatyn joldaǵan bolatyn. Konstıtýsıaǵa sáıkes, prezıdenttiń mindetin ýaqytsha oryndaýshy - Ózbekstan Respýblıkasynyń Olıı Májilisiniń Senat tóraǵasy Nıgmatılla Iýldashev.
