Samarqandtyń myńdaǵan turǵyndary tań sáresinen  Shahı-Zında kesheninde Ózbekstannyń birinshi prezıdenti Islam Kárimovtyń basyna  baryp jatyr, - dep habarlaıdy Qamshy.kz RIA Novostıge silteme jasap.  

Esterińizge salsaq, Ózbekstan prezıdenti Islam Kárimov qyrkúıektiń 2-i kúni 78 jasqa qaraǵan shaǵynda dúnıeden ótti. Qyrkúıektiń 3-i kúni týǵan jeri Samarqandta jerlendi.  Elde úsh kún qatarynan qaraly kún jarıalandy.  

   Jaqynda keshen qarapaıym adamdar úshin jabyq bolǵan, onda delegasıa múshelerin ǵana kirgizgen. Degenmen, jeksenbi kúni ol jerdiń esigi barshaǵa ashyq boldy. Kelýshilerdiń kóptiginen bir saǵattaı kezek kútýge týra keledi.  Qazir keshendi mılısıonerler kúzetip jatyr.

 Shahı- Zında kesheninde Ózbekstannyń orta ǵasyrdaǵy ataqty han, sultandary jáne búginge deıingi tanymal tulǵalar jerlengen, Kárimovtyń ata-anasy da osynda qoıylǵan.  90-shy jyldardan bastap keshende adam jerleý toqtatylǵan, biraq birinshi prezıdent úshin bul erejeni ózgertti.  

Islam Kárimov   19-shy ǵasyrda salynǵan Házireti – Hızr meshitiniń ashyq alańy janynda, keshenniń bas jaǵynda jerlendi. Onyń ata-anasy Shahı- Zından kesheniniń týra ózinde jerlengen.

 Kárimovtyń zıraty gúldermen kómkerilip tur, ázirshe eshqandaı mavzoleı men eskertkishter joq. Zırat mańaıynda kelýshilerge arnalǵan birneshe oryndyqtar tur.  Oryn jetpegenderi meshit aınalasyndaǵy qorshaý kirpishterine otyrady. Meshit moldasy birinshi prezıdentteriniń jatqan jeri jaıly bolýyna arnap  quran oqyp jatyr. Osylaı kelesi top kelip, óz duǵalaryn baǵyshtaýda.

 Adamdar kúni boıy tolastamaı kelip jatyr, tipti kún sońyna qaraı birneshe myńdaǵan adamǵa jetýi múkin. Kelýshilerdiń bári sómkelerin ótkizýge májbúr. Mılısıonerler men shtat adamdary eshkimniń sýretke túsirmeýin qatań qadaǵalaýda.  Kelýshilerdiń barshasyna aýyz sý taratylýda, sebebi Ózbekstanda áli de 30 gradýs ystyq.

Gazeta.uz-dyń málimetinshi, Ózbekstan Astanasynda qaraly kúnge baılanysty Ózbekstan týy túsirilip tur.