Kásipqoı boksshy Qanat Islamnyń qarsylasy belgili boldy, - dep habarlaıdy Qamshy.kz «Jas qazaqqa» silteme jasap.

Orta jeńil salmaq boıynsha Karıb aımaǵynyń úzdigi, WBA FedeCaribe tujyrymynyń chempıony otandasymyz kásipqoı boksshy Qanat Islam 29 qazanda Almaty qalasynda óziniń 22- kezdesýin ótkizedi.

Qarsylasy Ganalyq Patrık Aloteı(Patrick Allotey). Kásipqoı boksta «Ýly jebe» laqap atymen tanylǵan boksshy osy ýaqytqa deıin 36 kezdesý ótkizgen. 2 ret jeńilip, 34 jekpe-jeginde jeńiske jetken. 24 kezdesýinde qarsylasyn nokaýtpen utqan.

Soqqysy joıqyn, tájirıbeli Patrık Aloteımen Qanat Islam WBA (Interim) tujyrymy boıynsha álem chempıony ataǵy úshin judyryqtasady. Bul kezdesý osy jyldyń aıtýly oqıǵasy bolmaq. Jekpe-jek Almaty qalasynda «Almaty arena» sport kesheninde ótedi. Bas demeýshi «ZHERSU» korporasıasy. 

Otandasymyz kásipqoı boksshy Qanat Islam osy ýaqytqa deıin 21 kezdesý ótkizip, bárinde jeńiske jetken. Onyń 18-in nokaýtpen utqan. Laqap aty «Qazaq». Boks keshinde basqa da qazaqstandyq kásipqoı boksshylar judyryqtasady dep josparlanýda. Boks keshiniń bıletteri jaqynda satylymǵa shyǵady.